Ўзбекистон Республикаси Экология, атроф-муҳитни муҳофаза қилиш ва иқлим ўзгариши Вазири Азиз Абдуҳакимов Самарқанд халқаро иқлим форумида Вазирлик ва унинг ҳузуридаги Ўрмон хўжалиги агентлиги Жаҳон банки билан биргаликда “Ўзбекистонда барқарор ландшафтларни тиклаш” лойиҳаси бошланганини эълон қилди.
Бу лойиҳа Марказий Осиёнинг бешта давлатида ўрмонлар ва деградацияга учраган ерларни тиклашга кўмаклашиш бўйича амалга ошириладиган минтақавий дастурнинг бир қисмидир.
Жаҳон банки билан ҳамкорликда йўлга қўйилаётган лойиҳа Ўзбекистон ўрмон хўжалиги тизимини 2030 йилгача ривожлантириш консепсиясида белгиланган мақсадларга эришишга ёрдам беради. Бу 10 йиллик охирига қадар ўрмонлар майдонини 6,1 миллион гектарга етказиш масалаларини ҳам ўз ичига олади. Лойиҳа ерлари деградацияга учраган ерларга бут ва дарахтлар экиш орқали маҳаллий ландшафтларнинг барқарорлигини ва озиқ-овқат тизимларининг унумдорлигини оширади, шунингдек, аҳоли турмуш шароитини яхшилаш, инфратузилмани ривожлантириш ва иш ўринлари яратишга хизмат қилади. Бундан ташқари, лойиҳа табиий ресурслардан янада самарали фойдаланиш орқали кичик ва ўрта бизнесни қўллаб-қувватлайди ва муҳофаза этиладиган табиий ҳудудларда экотуризмни ривожлантиришга хизмат қилади.
Лойиҳа мамлакатнинг турли ҳудудларида ландшафтлар барқарорлигини таъминлаш ва ўрмонларни қайта тиклаш, шунингдек, Ўзбекистон ва Марказий Осиёнинг бошқа давлатлари ўртасида трансчегаравий табиий ҳудудларни тиклаш бўйича ҳамкорликни мустаҳкамлайди. Лойиҳа тадбирлари мамлакатимизнинг 6 та ҳудуди — Жиззах, Қашқадарё, Наманган, Самарқанд, Сурхондарё ва Сирдарё вилоятларида амалга оширилади.
Шунингдек, Darakchi.uz мухбири миллионлар сарфланаётган ушбу лойиҳа натижалари дарахтларнинг экилганидан сўнг тақдири нима бўлиши уларни парваришлашига қайси ташкилот маъсул эканлиги ҳақида савол билан вазирга юзланди.
Унга кўра, ушбу маблағлар нафақат экиш парваришлар учун ишлатилади, балки Экология вазирлиги ҳузуридаги Ўрмон хўжалиги агентлиги дарахтларни экиш ва парваришлашга масъулдир.
