Ўзбекистонда гиёҳвандлик воситалари билан боғлиқ жиноятлар учун жавобгарлик кучайтирилди. Энди ноқонуний нарколаборатория ташкил этган шахслар 5 йилдан 10 йилгача озодликдан маҳрум қилиниши мумкин.
11 июнь куни имзоланган қонун билан бир қатор қонун ҳужжатларига ўзгартиш ва қўшимчалар киритилди. Унга кўра, Жиноят кодексида гиёҳвандлик воситалари, психотроп моддалар ёки уларнинг аналогларини ишлаб чиқариш, тайёрлаш ва қайта ишлаш учун ғайриқонуний нарколаборатория ташкил этиш алоҳида жиноят сифатида белгиланди.
Шунингдек, гиёҳвандлик воситалари, психотроп моддалар, уларнинг аналоглари ёки кучли таъсир қилувчи моддаларни истеъмол қилиш ёки тарқатиш учун бангихона ташкил этиш ва сақлаш 3 йилдан 5 йилгача озодликдан маҳрум қилиш билан жазоланади.
Қонунга мувофиқ, гиёҳвандлик воситалари, психотроп моддалар ёки уларнинг аналоглари ҳамда кучли таъсир қилувчи моддаларнинг ноқонуний муомаласига ҳомийлик қилиш учун ҳам жиноий жавобгарлик белгиланди. Бундай қилмишни содир этган шахслар 5 йилдан 8 йилгача озодликдан маҳрум қилиниши мумкин.
Бундан ташқари, кучли таъсир қилувчи ёки заҳарли моддаларни ўғрилик ёки фирибгарлик йўли билан қонунга хилоф равишда эгаллаш учун ҳам жазо чоралари кучайтирилди.
Маълум қилинишича, мазкур ўзгартишлар аҳоли саломатлиги ва миллат генофондини гиёҳвандлик таҳдидидан ҳимоя қилиш, шунингдек, наркотик жиноятларнинг замонавий шаклларига қарши самарали курашиш мақсадида қабул қилинган.
