Ҳиндистон бош вазири Нарендра Моди қўшни Покистон билан тўрт кунлик ҳарбий тўқнашувдан сўнг 12 май куни халққа мурожаат билан чиқди. Унда сиёсатчи мамлакат бўлажак террорчилик ҳужумига кескин жавоб қайтаришини айтди. Бу ҳақда “BBC” маълум қилди.
“Бу уруш даври эмас, аммо бу террор даври ҳам эмас. Агар Ҳиндистонга қарши навбатдаги теракт амалга оширилса, кескин жавоб берилади,” дейди Моди 12 май кунги нутқида.
Ўзи нима бўлган эди?
Бу икки томон шиддатли ўққа тутиш ва ҳаво ҳужумлари бошланганидан бери биринчи оммавий чиқиш бўлди. Икки давлат ўртасидаги муносабатлар 22 апрель куни Кашмирнинг Паҳалгам ҳудудида юз берган террорчилик ҳужуми сабаб кескинлашди.
Ҳужум ортидаги талафот
Ҳужум оқибатида 26 киши ҳалок бўлди. Қуролли шахслар маҳаллий аҳоли ва сайёҳларга қарата ўт очди. Ҳиндистон Покистонни бу ҳужумни қўллаб-қувватлашда айблади. Покистон мазкур даъвони рад этиб, текширув ўтказишни талаб қилди.
Ҳиндистон сув оқимини тўхтатиб қўйди
Ҳиндистон Покистон билан 1960 йилдаги Ҳинд сувлар тўғрисидаги шартномани тўхтатиб, чегара бўйлаб сув оқимини тўхтатиб қўйди. Покистон бу уруш очишга тенг эканини билдирди. Мамлакат Ҳиндистон билан дипломатик ва савдо алоқаларини чеклади, ҳаво майдонини ёпди ва савдо алоқаларини тўхтатди.
Чегара бўйлаб кичик қуролли тўқнашувлар ва ракета синовлари кўпайди. Покистон қисқа масофали Fatah ракетасини синовдан ўтказди, Ҳиндистон эса хавфсизлик машғулотларини кучайтирди Халқаро ҳамжамият, жумладан Қўшма Штатлар, томонларни зиддиятни эскалация қилмасликка чақириб, дипломатик каналларни тиклашга чақирганди.
Уруш қандай тўхтади?
Ҳиндистон ва Покистон 10 май куни соат 17:00 дан бошлаб қуруқликда, ҳавода ва денгизда барча отишмалар ва ҳарбий ҳаракатларни тўхтатишга келишиб олди. Бир неча соат ўтгач, Ҳиндистоннинг Жамму ва Кашмир иттифоқдош ҳудуди раҳбари Умар Абдулла Жамму ва Кашмирнинг ёзги пойтахти Сринагар шаҳри яқинида портлаш овозлари ва Ҳиндистон ҳаво мудофааси ишлари ҳақида хабар берди.
“АҚШ воситачилигида ушбу икки ядро қуролига эга қўшнилар ўртасида келишилган ўт очишни тўхтатиш тартиби ҳозирча сақланиб қолган”, — деб ёзмоқда BBC.
