Қозоғистон – Ўзбекистон чегарасидаги "Тажен" ва "Довут Ота" назорат-ўтказиш пунктлари таъмирлаш ишлари туфайли яна 4 ойга ёпилди. Бу ҳақда Божхона қўмитаси хабар берди.
Хабарга кўра, Қозоғистон Республикасининг «Тажен» (Ўзбекистон Республикасининг «Довут-ота») чегара ўтказиш пункти орқали шахслар, енгил автомобиллар, автобуслар ҳамда рухсат этилган тўлиқ вазни 3,5 тоннадан ошмайдиган юк автомобиллари ҳаракати бўйича жорий йил 1 февраль санасидан киритилган чекловлар яна жорий йилнинг 1 сентябрига қадар узайтирилди.
Чеклов муддатининг узайтирилиши мазкур ўтказиш пунктларида муҳандислик тармоқларини ётқизиш, биноларни капитал таъмирлаш, металл конструкцияларни ўрнатиш каби кенг кўламли ишлар олиб борилаётганлиги сабабли Қозоғистон Республикаси томонидан жисмоний шахслар ва транспорт воситаларининг хавфсизлигини таъминлаш, қурилиш ва реконструкция ишларини жадаллаштириш мақсадида жорий этилмоқда.
Рухсат этилган тўлиқ вазни 3,5 тоннадан ортиқ бўлган юк автомобиллари «Тажен» (Қозоғистон) – “Довут ота” (Ўзбекистон) чегара ўтказиш пункти орқали ҳаракатни амалга оширишлари мумкин.
