Ўзбекистон элчихонаси Ҳиндистонга алдов йўли билан олиб келинган ва одам савдоси қурбонига айланиш хавфи остида қолган аёлнинг ватанга қайтишига амалий ёрдам кўрсатди. Бу ҳақда "Дунё" ахборот агентлиги хабар қилди.
Дипломатик миссия консуллик бўлимига Ҳиндистон ҳуқуқ-тартибот идораларидан Деҳлидаги Индира Ганди халқаро аэропортида руҳий тушкунлик ҳолатидаги З.Т. исмли Ўзбекистон фуқароси аниқлангани ҳақида маълумот келиб тушган.
Шундан сўнг фуқаро билан алоқа ўрнатилиб, у элчихонага олиб келинган. Суриштирув жараёнида З.Т.га икки киши ошхоналардан бирида официант бўлиб ишлаш таклифи билдиргани аниқланган. Бироқ аёл мамлакатга келиб, меҳмонхонага жойлашгач, алданганини билиб қолган ва уни Ўзбекистонга қайтариб юборишларини талаб қилган.
Аммо икки киши аёлдан унинг учун сарфланган йўл харажатларини қоплаб беришини талаб қилган ҳамда жинсий хизмат кўрсатишга мажбурлашга ҳаракат қилган. З.Т. ўзи ушлаб турилган маскандан қочиш ва маҳаллий полиция вакилларига мурожаат қилишга муваффақ бўлган.
Ўзбекистон элчихонаси аёлга тезкор консуллик-ҳуқуқий ёрдами кўрсатган ҳамда ҳомий ташкилотлар кўмагида Деҳли — Тошкент йўналишидаги авиарейсга чипта сотиб олинган.
Ҳиндистоннинг тегишли муассасалари билан Ўзбекистон фуқаросини Деҳлига келтириб, эксплуатация қилишга уринишда гумон қилинаётган шахсларга нисбатан қонуний чора кўрилиши бўйича ҳамкорлик қилинмоқда, дейилади хабарда.
Дипломатик миссия ўзбекистонликларни Ҳиндистонга сафар қилишдан олдин турли шубҳали гуруҳ ёки шахсларнинг ёлғон ваъдаларига алданиб қолмаслик, ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақирди.
Элчихона бундай ҳолатлар юзага келган тақдирда зарур консуллик-ҳуқуқий ёрдами кўрсатилиши учун зудлик билан қуйидаги воситалар орқали мурожаат қилишни тавсия қилади:
- телефон: +91 11 2467 0774/75;
- Telegram-бот: @consuluzbindia_bot.
