Сув бўйидаги ерлар, фермер хўжаликлари эгалигидаги майдонлар, ҳатто давлатга қарашли ҳудудлар… Пул эвазига кимлар нима таклиф қилмаяпти? Бош прокуратура ҳузуридаги Департамент ва ҳуқуқ-тартибот идоралари ўтказган бир қатор тезкор тадбирлар, афсуски, айрим фуқароларнинг ерга доир қонунни менсимаётганини яна бир бор кўрсатди.
Сурхондарё, Наманган, Навоий ва Сирдарё вилоятларида ўтказилган тадбирларда юз минглаб долларлар, миллионлаб сўмлар эвазига ноқонуний ер савдоси билан боғлиқ ҳолатлар фош этилди.
Сурхондарё – дарё бўйидаги ерлар савдоси:
“Тупаланг-Қоратўғ” ирриагатсия тизимлари бошқармасида сув назоратчиси бўлиб ишлаган А.Н. Тупаланг дарёси бўйида, “Аму-Сурхон” тизимига қарашли 32 сотих ер майдонини фуқаро С.Х.га 73 500 доллар эвазига сотмоқчи бўлган. У 70 минг доллар ва 39 миллион сўмни олаётганида қўлга олинди.
Наманган – таниш-билиш орқали ер расмийлаштириш ваъда қилган:
Муқаддам судланган фуқаро Н.Ш. 25 сотих ер майдонини юқори лавозимлардаги танишлари ёрдамида бошқа фуқаро номига ўтказиб беришини айтиб, 60 минг доллардан 30 мингини олаётганда ушланган.
Навоий – 18 гектар ер 190 миллион сўмга баҳоланди:
“Ч.О.” фермер хўжалигига тегишли, ижарага ажратилган 18,7 гектар ер майдонини фуқаро А.Қ. 200 миллион сўмга сотишга келишган. Пулнинг 190 миллиони олинган пайтда у ҳуқуқ-тартибот органлари томонидан ушланган.
Сирдарё – ўзини фермер деб таништириб, ер “сотган”:
Муқаддам судланган Д.Э. ўзини фермер хўжалиги раҳбари деб таништириб, “Мирзачўл” СИЮ ҳудудидаги 13 гектар ер майдонини ўзиники дея кўрсатиб, 100 миллион сўмга “сотишга” уринган. Пулнинг 56 миллион сўмини олаётганида ушланди.
Барчаси Жиноят кодекси доирасида:
Ушбу ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган, тергов ишлари давом этмоқда.
Ер — бойлик. Лекин бу бойлик устидан ноқонуний йўл билан даромад қилишга уриниш – нафақат қонунга зид, балки бутун тизимга ишончни емирувчи жиноятдир.
