Украина жаҳон савдосининг тарқоқлиги ва Европа билан алоқаларни мустаҳкамлаш фонида АҚШ долларидан еврога ўтиш имкониятини кўриб чиқмоқда. Бу ҳақда мамлакат Миллий банки раҳбари Андрей Пишний “Reuters” нашрига берган интервьюсида сўз очди.
Пишний бундай кескин бурилишга бир қанча далиллар келтирган. Биринчидан, Украинанинг Европа Иттифоқига потенциал аъзолиги еврони базавий валюта сифатида танлашни мантиқий ва асосли қилади. Иккинчидан, евро глобал бозорларда долларга нисбатан юқори қийматга эга.
“Европа Иттифоқига қўшилиш эҳтимоли, Европа Иттифоқининг Украина мудофаа қобилиятини таъминлашдаги ролининг кучайиши, жаҳон бозорларидаги катта ўзгарувчанлик ва жаҳон савдосининг парчаланиш эҳтимоли Миллий банкни еврони доллар ўрнига Украина гривнаси учун базавий валюта қилиш ёки қилмаслик масаласини қайта кўриб чиқишга мажбур қилмоқда”, деган у ўз нутқи давомида.
Украина миллий банки раҳбари, шунингдек, Украина валюта бозорининг аксарият сегментларида евродаги операциялар улуши аллақачон ўсиб бораётганини таъкидлаган.
“Бу иш мураккаб ва сифатли, ҳар томонлама тайёргарликни талаб қилади”, дея қўшимча қилган Пишний.
Украина ҳарбий саъй-ҳаракатларни таъминлаш учун ташқи молиялаштиришга умид қилмоқда. Миллий банк раҳбарининг қўшимча қилишича, Киев бу йил 55 миллиард доллар кутмоқда, улар нафақат бюджет тақчиллигини қоплайди, балки ёрдам ҳажми қисқариши мумкин бўлган келгуси йиллар учун давлат молияси захирасини яратиш учун ҳам ишлатилади.
Маълумот учун, Украина 1996 йилда гривнани жорий қилган ва ўнлаб йиллар давомида долларни асосий валюта сифатида ишлатган.
2022 йил февраль ойида Украина Миллий банки капитал ҳаракати устидан назорат ўрнатган ва гривнани долларга қаттиқ боғлаган, кейин эса бюджет номутаносиблиги тўпланиб қолгани сабабли девальвация ўтказишга мажбур бўлган.
