Президент Шавкат Мирзиёев Наманганда ўтаётган “Камбағалликдан фаровонлик сари” халқаро форумининг очилишида нутқ сўзлаб, камбағалликка қарши курашда Ўзбекистон босиб ўтган йўлни таҳлил қилди.
Унинг таъкидлашича, сўнгги саккиз йил ичида инсон ҳуқуқларини ҳимоя қилиш, аҳолини муносиб иш билан таъминлаш ва турмуш шароитини яхшилаш бўйича кенг кўламли ишлар амалга оширилди. Айниқса, ёшлар ва аёллар учун имкониятлар кенгайтирилиб, камбағалликка қарши кураш давлат сиёсатининг устувор йўналишига айлантирилди.
Давлат раҳбари дастлабки йилларда камбағаллик даражасини ўлчаш бўйича аниқлик етишмаганини эслатиб ўтди. Аммо Жаҳон банки ва БМТ кўмагида халқаро тажриба асосида миллий мезонлар ишлаб чиқилди. Ўзбекистон Конституциясига мувофиқ, эндиликда пенсия, нафақа ва ижтимоий ёрдам миқдори энг кам истеъмол харажатларидан паст бўлиши мумкин эмас.
Ислоҳотлар натижасида 7,5 миллион киши камбағалликдан чиқарилган бўлса, 2024 йил охиригача бу кўрсаткич 6 фоизгача туширилиши режалаштирилган.
