Anadolu агентлигининг ёзишича, Ослодаги жамоат транспорти учун масъул Ruter компанияси ёз ойларида икки автобусни — бири Нидерландияда, иккинчиси Хитойда ишлаб чиқарилган — махфий тестдан ўтказган. Текширув натижасида Нидерландия моделида бундай имконият мавжуд эмаслиги, Yutong электробусларида эса ишлаб чиқарувчи масофадан дастурий бошқарув ўрнатгани аниқланган.
Мутахассислар бу тизим ёвуз мақсадларда қўлланса, транспорт воситаларининг бутун электрон инфратузилмаси ишдан чиқиши мумкинлигини таъкидлади.
Бу ҳолат Европада рақамли хавфсизлик ва ташқи технологияларга қарамлик масаласини яна кун тартибига олиб чиқди.
Норвегияда олинган натижалардан сўнг диққат Данияга қаратилди — мамлакатда ҳозирда 262 та Yutong электробус фаолият кўрсатмоқда.
Дания транспорт оператори Movia раҳбари Еппе Гаард бу ҳолат юзасидан текширув бошланганини маълум қилди.
Европа расмийлари хорижий технологиялар орқали ташқи таъсир эҳтимолига эътибор қаратмоқда. Киберхавфсизлик мутахассислари эса транспорт инфратузилмасида миллий дастурий таъминот ва серверлардан фойдаланиш зарурлигини таъкидлади.
Аввалроқ Хитойдан Тошкентга 202 та Yutong электробуслари олиб келингани ҳақида хабар берилган эди.
