Ховос туманида боғдорчилик билан шуғулланувчи МЧЖ даласидан полиэтилен целлофан ўғирлангани ҳақида ИИБга мурожаат тушгач, бўлимнинг подполковник ва майор унвонидаги икки нафар катта тезкор ходими 4 фуқарони мажбуран бўлимга олиб кетгани маълум бўлди.
Тезкор ходимлар уларни “қамаб қўйиш” билан қўрқитиб, ишни тўхтатиш эвазига 55 млн сўм талаб қилган. Кейинроқ “зарарни қоплаш” учун 24 млн сўм олгани айтилмоқда. Шунингдек, жиноят иши қўзғатмаслик ва ҳужжатларни маъмурий жавобгарликка мослаб судга юбориш учун қўшимча 11 млн сўм талаб қилишган.
ДХХнинг Сирдарё вилояти бўйича бошқармаси, вилоят прокуратураси ва ИИВ Шахсий хавфсизлик бош бошқармаси томонидан ўтказилган тезкор тадбирда улар 11 млн сўмни олаётган вақтда ашёвий далиллар билан ушланган.
Уларга нисбатан ЖКнинг 210-моддаси (пора олиш) 2-қисми “в”, “г” бандлари билан жиноят иши қўзғатилиб, “қамоқ” эҳтиёт чораси қўлланилган. Тергов ҳаракатлари давом этмоқда.
