Президент "2027 йилда футбол бўйича U-20 жаҳон чемпионатини тайёрлаш ва ўтказиш чора-тадбирлари тўғрисида"ги қарорни имзолади.
Ҳужжат 2027 йилда Ўзбекистон ва Озарбайжонда бўлиб ўтадиган футбол бўйича U-20 жаҳон чемпионатини юқори савияда ташкил этиш, шунингдек, Халқаро футбол федерацияси (ФИФА) ва Осиё футбол конфедерациясининг нуфузли йирик мусобақаларини ўтказиш мақсадида тайёрланган.
Қарорга мувофиқ, Тошкент шаҳрида Ўзбекистон футбол ассоциацияси биносида Марказий Осиё мамлакатлари учун ФИФАнинг Ҳудудий офиси бепул асосда очилади.
Ҳудудий офисни ташкил этиш ва сақлаш харажатлари, аввало, ФИФА томонидан ажратиладиган маблағлар ҳисобидан қопланади. Етишмаётган қисми эса Ўзбекистон футболини қўллаб-қувватлаш жамғармаси маблағлари ҳисобидан, бироқ умумий харажатларнинг 50 фоизидан ошмаган миқдорда молиялаштирилади.
Ҳудудий офис биносини таъмирлаш, зарур мебеллар, ускуналар, техника ва транспорт воситалари билан таъминлаш харажатлари қарорга мувофиқ Реконструкция ва ривожланиш жамғармаси томонидан ажратиладиган маблағлар ҳисобидан қопланади. Шу билан бирга, офисни сақлаш бўйича минимал талаблар Ўзбекистон футбол ассоциацияси томонидан белгиланади.
