Ар-Риёд шаҳрида жойлашган АҚШ элчихонаси ҳудудида портлашдан сўнг ёнғин чиққан. Бу ҳақда Reuters хабар берди.
N12 телеканали Telegram саҳифасида юқори лавозимли америкалик амалдорга таяниб, элчихона эҳтимол дрон ёрдамида нишонга олинганини маълум қилди. Кейинроқ Саудия Арабистони Мудофаа вазирлиги X ижтимоий тармоғидаги баёнотида дастлабки маълумотларга кўра дипломатик ваколатхона икки учувчисиз учиш қурилмаси билан нишонга олингани ва шундан сўнг кичик ёнғин юз берганини билдирди. Вазирликка кўра, етказилган зарар катта эмас.
Fox News мухбири Женнифер Гриффин манбага таяниб, ҳужум эҳтимол Эрон дронлари томонидан амалга оширилганини ёзган. CNN ҳам Эрон учувчисиз қурилмалари зарбаси ҳақида хабар берди. Воқеа пайтида элчихонада ҳеч ким бўлмаган, жабрланганлар йўқ.
Элчихона баёнотида Жидда, Ар-Риёд ва Дахрон шаҳарларидаги америкаликлар зудлик билан турган жойида паноҳ топиши ва минтақадаги ҳарбий объектларга бормаслиги сўралган.
2 март куни Қувайтдаги АҚШ дипломатик ваколатхонаси биноси устида ҳам тутун кўтарилгани ҳақида Reuters хабар қилган эди. Кейинроқ элчихона ҳудудда ракета ва дрон ҳужумлари доимий таҳдиди мавжудлигини билдирган.
