Ўзбекистоннинг Истанбулдаги Бош консулхонаси Туркияда бўлиб турган ўзбекистонликларни шахсий масъулиятни ошириш ва хавфсизлик қоидаларига қатъий риоя этишга чақирди.
Фуқаролардан кундалик ҳаётда соғлиқ ва ҳаётга хавф туғдириши мумкин бўлган шубҳали вазиятлардан узоқда бўлиш, оммавий йиғилиш ва намойишларда иштирок этмаслик, шунингдек, гавжум жойларда ҳушёрликни кучайтириш сўралган.
Маълум қилинишича, қонуний ҳуқуқ ва манфаатлари бузилган ёки оғир ҳолатга тушиб қолган фуқаролар зудлик билан Туркия ҳуқуқ-тартибот органларига 155 (полиция) ёки 156 (жандармерия) қисқа рақамлари орқали, шунингдек, Бош консулхонанинг 24/7 ишонч телефонига мурожаат қилиши керак.
Шунингдек, агар фуқаро ёки унинг яқинлари маҳаллий ҳуқуқ-тартибот идоралари томонидан қўлга олинса ёки озодлиги чекланса, улар адвокат ёрдамини талаб қилиш, яқинларига хабар бериш ва Бош консулхона билан боғланиш ҳуқуқига эга экани таъкидланган.
“Ҳурматли ватандошлар! Сизнинг ҳуқуқ ва манфаатларингиз давлат ҳимоясидадир!”, дейилади хабарда.
Бош консулхона, шунингдек, пул эвазига Туркияда яшаш ҳужжатларини расмийлаштириш, даромадли иш ёки АҚШ ҳамда Европа давлатлари визаларини ваъда қилаётган фирибгарлардан эҳтиёт бўлишга чақирган.
Бундан ташқари, расмий рухсатномаси бўлмаган такси хизматларидан, айниқса аёллар ва ёлғиз шахслар фойдаланмаслиги тавсия этилган.
