28-29 март кунлари Андижон вилоятининг Қўрғонтепа, Бўз, Асака туманлари ва Андижон шаҳрида Ўзбекистон Республикаси Президентининг Давлат маслаҳатчиси, Президент девонининг Жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати раҳбари Турсунхон Худойберганов иштирокида аҳоли учун навбатдаги сайёр қабуллар ташкил этилди.
Сайёр қабулларда Андижон вилояти ҳамда туман ва шаҳарлар ҳокимликлари, прокуратура, ички ишлар, суд органлари раҳбарлари, бошқа тегишли бошқарма ва ташкилотлар мутасаддилари иштирок этди.
Тадбирларда таъкидлангандек, бугунги кунга келиб Андижон вилояти аҳолисидан Президентнинг Виртуал қабулхонаси ва Халқ қабулхоналарига 50 мингга зиёд мурожаат ва аризалар келиб тушган бўлиб, уларнинг деярли барчаси асосли деб топилган ва назоратга олинган. Ҳозирда уларнинг 46 мингга яқинига тегишли жавоблар берилган ва қаноатлантирилган бўлиб, 4 мингдан зиёди ўрганиш ва ҳал этиш жараёнида.
Таҳлилларга кўра, мурожаатларнинг аксарият қисмини уй-жой масаласи, болаларни нафақа пули билан таъминлаш, ички йўлларни таъмирлаш, мактабгача таълим муассасаларини барпо этишдаги муаммолар, аҳолига тиббий хизмат кўрсатиш, соғлиқни сақлаш, тадбиркорликни қўллаб-қувватлаш, вояга етмаган болаларга алимент тўлаш, аҳолини тўлдирилган баллонли газ билан таъминлаш каби масалалар қамраб олган.
Андижон вилоятига уюштирилган мазкур сайёр қабулларда Ўзбекистон Республикаси Президентининг Виртуал қабулхонаси ва Халқ қабулхоналарига келиб тушган фуқароларнинг турли мазмундаги 300 га яқин мурожаатлари кўриб чиқилиб, уларнинг аксарият қисми жойида ҳал этилди.
Мисол учун, Хонобод шаҳрида истиқомат қилувчи Д.Аҳмедова Президент Виртуал қабулхонасига тадбиркорлик учун имтиёзли кредит олишда ёрдам сўраб мурожаат қилган эди, унинг илтимоси вилоятдаги Халқ банки филиали томонидан қаноатлантирилди.
Избоскан туманида яшовчи Т.Бўстонов фарзандига бола нафақасини тайинлашда амалий ёрдам кўрсатишни илтимос қилиб Халқ қабулхонасига мурожаат этган. Унинг мурожаат шу кунинг ўзида МФЙ қошидаги “Нафақа тайинлаш ва тўлаш” комиссияси томонидан кўриб чиқилиб, ижобй ҳал этилди.
Сайёр қабуллар якунида кўриб чиқилган барча мурожаатлар бўйича вилоят, шаҳар ва туман даражасидаги мутасадди идора ва ташкилотларга тегишли кўрсатмалар берилди.
Сайёр қабуллар 31 март ва 1 апрель кунлари Фарғона вилоятнинг қатор туман ва шаҳарларида давом эттирилади.
