Гиннесснинг рекордлар китоби дунёнинг 100 та мамлакатида 22 тилда чоп этилади. Қуйида сизни мазкур китобга киритилган ғайриоддий рекордлар билан таништирамиз, деб хабар беради “Kp.ua” нашри.
Американинг Массачусетс штатида яшовчи 24 ёшли Мустафо Исмоилнинг билак мушагининг айланаси 78 сантиметрни ташкил этади. У елкаси, билаклари танасига номутаносиб равишда ривожланган мультфильм қаҳрамони Папайдан фарқли равишда исмалоқ эмас, товуқ гўшти истеъмол қилишни хуш кўради. Бундай натижага эришиш учун Исмоил 10 йил давомида кунига икки маҳал спортзалга қатнаган.
Рекордчилар орасида дунёнинг энг кекса гимнастикачиси, Германиянинг Лейпциг шаҳрида яшовчи, 86 ёшли собиқ жисмоний тарбия ўқитувчиси Йоханна Каас ҳам бор. Пенсионер аёл немисларнинг Котбус шаҳрида спорт гимнастикаси бўчиа ўтказилган дунё Кубоги мусобақаларининг танаффус пайтида брусда мураккаб гимнастика ҳаракатларини амалга ошириб, томошабинларнинг олқишига сазовор бўлди ва ижтимоий тармоқлар юлдузига айланди. Йоханна Каас ҳаётда мақсади гимнастика билан шуғулланиш эмас, балки кўнгил ёзиш учун гимнастика билан шуғулланишини таъкидлаганига қарамай, у кекса спортчилар орасида ўтказилган мусобақаларда 11 та медални қўлга киритган.
Лондонлик сумо курашчиси Шарран Александр дунёнинг энг вазни оғир спортчиси, деб тан олинган, унинг оғирли 203,2 килограммни ташкил этади. Александр вазнини йўқотмаслик, рингда юқори натижаларга эришиш учун улкан миқдордаги юқори калорияли таомларни истеъмол қилади.
Гиннеснинг рекордлар Китобида дунёнинг энг улкан оти ҳам бор. Американинг Висконсон штатидаги тўққиз ёшли Улкан Жейк лақабли отнинг баландлиги 213 сантиметрни ташкил этади (Отларнинг ўртача баландлиги 160 сантиметрни ташкил этади).
Шимолий Ирландиянинг Антрим графлигида яшовчи икки ёшли Арчи лақабли буқа миттилиги билан бошқа буқалардан фарқ қилади. Унинг туёқларидан яғринигача бўлган бўйи бор-йўғи 76 сантиметрни ташкил этади. Арчини эгалари аслида гўшт учун сотиб олишган эди, аммо унинг бўйи ўсмай қолганини кўргач, фикрларидан қайтишди. Оиланинг эрка ва севимли жониворига айланган Арчини қассобга топширмасликка қарор қилишди.
Американинг Мичиган штатида яшовчи уч ёшли Зевс лақабли немис доги дунёнинг энг балад ити сифатида Гиннеснинг рекордлар китобига киритилган. Унинг бўйи 223 сантиметрни ташкил этади.
Германиялик 52 ёшли Беттина Дорфман дунё бўйича энг кўп Барби қўғирчоқларини йиғган аёл сифатида рекорд ўрнатган. У ўзининг илк қўғирчоғини 1993 йилда сотиб олган. Ҳозирда унинг коллекциясида 15 мингта малласоч Барби қўғирчоқлари мавжуд.
Япониялик дизайнер Кадзухиро Ватанабэ дунёнинг энг баланд соч турмагида юради. Унинг соч турмаги баландлиги 113 сантиметрни ташкил этади.
- Бундай юқори натижага эришишим осон кечмаган бўлса-да, аммо дунёда “биринчи рақамли одам”га айланганимдан жуда ҳам мамнунман! – дейди у. У рекорд натижага эришиш учун 15 йил давомида сочини ўстирган. Мазкур турмакни тайёрлаш учун учта сартарош, уч баллон соч лаки ва бир шиша махсус гель зарур бўлади.
- Ҳар куни бундай турмакда юриш менга қимматга тушади. Шунинг учун бирор кечага, тадбирга ёки рекордни намойиш қилишим керак бўлгандагина сочимни шу усулда турмаклайман, - деб изоҳ берди дизайнер. – 20 ёшда эканлигимда илк маротаба Гиннесснинг рекордлар китоби мавжудлиги ҳақида эшитиб қолдим. Шундан кейин қай усулда бўлса-да, мазкур китобга киришни олдимга мақсад қилдим.
