— 7 ойлик ҳомиладорман. Шу кунларда бошим оғриб, ўзимни ёмон ҳис қила бошладим. Қон босимим ошибди. Айтишларича, артериал қон босими баланд ҳомиладорларнинг туғиш жараёни хавфли кечар экан. Шу гап ростми?
АЗИЗА, Навоий вилояти
Саволга олий тоифали шифокор, акушер-гинеколог Нилуфар БЎСТОНОВА жавоб беради.
— Ҳомиладорликнинг сўнгги уч ойлигида аёлнинг артериал қон босими ошиши патология қисобланади. Даволаш чоралари кечиктирилмаслиги зарур. Бу даврда қон босимининг кўтарилишига бўйракдаги шамоллаш ёки тошлар, шунингдек, ҳомиланинг жадаллик билан ўсиб онанинг буйрагига босим бераётгани сабаб бўлиши мумкин. Қон босими кўтарилганда йўлдошда жойлашган қон томирлари ҳомилага кислород етказиб беришга улгурмайди. Натижада эса ҳомилада асфексия, бош мия қон босими ошиш хавфи ортади. Бундай аёллар туғруққача шифокор назоратида бўлишлари зарур. Туғруқдан сўнг аёл буйрагини даволатиши керак.
