Ўзбекистонлик оилавий “Ҳавас” гуруҳи ҳиндистонликларни лол қолдирди (Видео)

Ҳинд мусиқасининг ҳақиқий ихлосманди бўлган тошкентлик , оилавий “Ҳавас” гуруҳи Ҳиндистон телеканали мусиқий танловида барчани лол колдирди. Иқтидорли фарзандлардан иборат мазкур оила ўз номи билан ҳавас қилишга арзийди. Гуруҳ Қаҳрамон ва унинг укаси, икки нафар синглисидан иборатдир. Ҳинд бошловчилари уларни саҳнага таклиф этар экан, “Қаҳрамон ва унинг оиласи, Тошкент, Ўзбекистон!” деб эълон қилди. Қаҳрамон ва унинг оиласи ҳақида, ватанимизнинг тарихий гўшалари, манзаралари акс этган видеоролик намойиш этилди.

Унда Қаҳрамон ўзини таништириб, шундай деди: “Менинг исмим Қаҳрамон. Ўзбекистоннинг Тошкент шаҳридан келдим. Ҳинд мусиқасига иштиёқим ота-онам туфайли пайдо бўлган. Айниқса ҳинд мусиқаси, ҳинд қўшиқлари, Раж Капур иштирок этган фильмларни жуда яхши кўраман”. Шундан кейин “Ҳавас” гуруҳи саҳнага таклиф этилди. Қаҳрамон ҳакамлар ҳайъатига уларни номма-ном таништирди. “Синглим – Шаҳноза, укам – Достонбек, синглим – Робия”. Ҳакамлар ҳайъатига ҳиндистонлик машҳур кинорежиссёр, продюсер ва телебошловчи Коран Жоҳар бошчилик қилди. “Ҳавас” гуруҳи ҳинд қўшиғини ижро этиб бўлгач, ҳиндистонлик томошабинлар уларни ўрнидан турган ҳолда гулдурос қарсақлар билан олқишлади.

Бошловчи “Бошқаларни билмадим-у, улар ҳақиқий ҳинд оиласига ўхшар экан”, деди томошабинларга қараб. Унинг гапини Каран Жоҳар давом эттирди: “Жуда ҳам тўғри айтдингиз!”. “Қаҳрамон Ҳиндистонга ота-онаси билан ташриф буюрган!”, деб маълум қилди бошловчи. “Марҳамат, уларни саҳнага таклиф этинг!”, деди Каран Жаҳор. Саҳнага Қаҳрамоннинг ота-онаси кичкина қизалоқ билан бирга чиқди. Кичкинтой қизалоқни кўрган Каран Жоҳар уни эркалатмасдан туролмади, у қизчанинг исмини сўради, “Гулирайҳон”, деб таништирди оила бошлиғи. “Жудаям чиройли, жудаям ажойиб исм. Хуш келибсизлир! Бу жуда ҳам қувончли онлар! Саҳнада турган бутун бошли оила Ўзбекистондан ташриф буюрибди. Сизларни кўрганимиздан жудаям хурсандмиз. Энг асосийси кенжатойимиз, жажжи қизалоғимиз менга жуда ҳам ёқди. Саҳнага чиқиб уни бир эркалатсам!”, деб Каран Жоҳар саҳна томон йўл олди ва қизчани бағрига босиб, эркалади.

Шундан кейин бошловчи Каран Жоҳарга “Қаҳрамоннинг ота-онасини сизга айтадиган тилаклари бор экан”, деди. Сўзга чиққан она турмуш ўртоғи билан олий ўқув юртида бирга ўқиганини, айнан ҳинд мусиқаси орқали муҳаббатлари дунёга келганини билдириб, машҳур ҳинд актёри, режиссёри Раж Капурнинг қўшиғини турмуш ўртоғи билан бирга ижро этди. Уларнинг қўшиғига ҳакамлар ҳайъати ҳам жўр бўлди. Ҳиндистонлик санъаткорлар “Ҳавас” оилавий гуруҳининг чиқишини юқори баҳолаб, танловдаги иштироклари учун миннатдорчилик билдирди.