«SUG‘DIYONA» нима дейди?: — Азиз мухлис, қўйинг, бу ёлғон савдода иштирок этманг! Йигит қанчалик яхши кўринмасин, ҳақиқат шуки, у сизни алдади. Келинг, ҳолатингизни ҳар томонлама таҳлил қиламиз. Сиз бу йигит билан алоқани давом эттириб нималарга эришасиз ва нималарни йўқотасиз?
Сизни ҳеч ким оқламайди, қўллаб-қувватламайди ҳам.
Ҳамма айбни ўзингизни тўнкашади. Оилали эркаклигини бошида билмаганингизни ҳеч кимга исботлаб беролмайсиз.
Исталган пайт хотини келиб, маҳалла, ишхонангиз олдида тўполон қилиб, бўлмаган ишлар учун шармандангизни чиқариши мумкин.
Оилали эркак билан фақат «SMS»лашиб юрганингизга биров ишонмайди, чунки одамлар тасаввурида уларни музқаймоқ ялаб юришга тоқати йўқ. Демак, шаънингиз, номусингиз тўла хавфда қолади.
Ўйламанг, ҳеч қандай муносабат, ҳатто, севги ота-онанинг фарзандига бўлган муҳаббатидан устун бўла олмайди. Бобур боласи учун яшаб юрганини айтдими, демак, сиз ҳам айнан мана шу бола учун ёлғончи туйғуларингиздан воз кечинг!
Наҳотки, сизни тўлақонли бахт қизиқтирмаса? Наҳотки кимдандир қолган кўйлакдан бошқасини топа олмайсиз? Майли, у Бобурнинг имкониятларига, ютуқларига эга бўлмасин, аммо турмушга чиқадиган йигитингизнинг ўтмиши ҳам, келажаги ҳам сиз билан бошлансин!
«Йигитни бошқара оламан, истасам, у билан ўзим оила яратаман», деб хомтама бўлманг. У исталган пайт яна ортига қайтиб кетиши мумкин, чунки борадиган жойи — биринчи оиласи бор.
Уйланган ошиқлардан огоҳ бўлинг!
Тўғри, улар қиз боланинг кўнглини олишни, унга қачон, қаерда қандай муомала қилишни яхши билишади. Шунинг учун ҳам қизлар бундайларнинг қармоғига тезда илинади.
Бошқалардан ажралиб туради, чунки севишимни айтсамми-айтмасамми деб иккиланадиган бўз йигит эмас-да! Улар аллақачон пул топади, оила боқади, ортганини қизларга сарфлашни истаб қолган бетийиқ романтиклар, холос.
Энг катта огоҳлантирувчи белги бу, унинг ёшидир. Уйланган-у, аммо оиласидан кўнгли тўлса-тўлмаса, яна ўзига кўчадан «ёр» излаш даврига етиб келгунча йигитнинг ёши 30 га яқинлашиб, баъзан ошиб қолади.
Агар сиз унга истаган пайт қўнғироқ қила олмасангиз, у ҳам кўпинча сиз билан яширинча гаплашса, билингки, тўй кўрмаган йигит эмас, кимнингдир эри бўлиши мумкин.
«Оиламдан ажрашиб, сенга уйланаман. Биз бир-биримизни кеч топдик», деган дийдиёларга ишонманг! Ҳатто сўзининг устидан чиққан тақдирда ҳам бундай ҳаётдан бахт топиб яшаш амримаҳол. Кўзингизни очинг, қизлар!
Азиза ҚУРБОНОВА
Манба: "SUG‘DIYONA" газетаси
