Олий суд матбуот котиби Азиз Обидовнинг маълум қилишича, январь ойида корхонанинг 3 нафар мансабдори ва бошқалар устидан дастлабки суд мажлиси ўтган. Навбатдаги суд жараёни 24 февраль куни Жиноят ишлари бўйича Мирзо Улуғбек туман судида бўлиб ўтади.
Маълумотларга кўра, “Ўзавтойўлбелги” директори Воситхон Акрамов Жиноят кодексининг 167-моддаси (ўзлаштириш ёки растрата), 209-модда (мансаб сохтакорлиги), 228-модда (ҳужжатлар ва бланкаларни қалбакилаштириш) бўйича айбланмоқда. Директор ўринбосари Шукрулло Асадов ва маркетинг бўлими бошлиғи Баҳром Саидов ҳам шунга ўхшаш моддалар бўйича айб остида.
Шунингдек, бошқа мансабдорлар — Шораҳмат Обидхўжаев, Нурулло Абдураҳмонов, Шавкат Маматхонов, Сарваржон Мадаминов, Саида Маҳмудова, Муҳайё Йўлдошева ва Шарофиддин Исомуҳаммедов — ҳам 167, 209 ва 228-моддалар бўйича айбланмоқда. Тергов ҳаракатлари олиб борилмоқда.
