Фермер хўжалиги ҳудудида ука ўз акасини ов милтиғи билан отиб ўлдирган.
2026 йил 12 февраль куни соат 11:30 ларда Нарпай тумани “Ҳўжакарзон” маҳалласида жойлашган “Асилбек олтин балиқлари” фермер хўжалигида ака-ука ўртасида жанжал келиб чиққан. Тергов маълумотларига кўра, А.Саидов ариқдан сув ўтказиш масаласида акаси У.Саидов билан тортишиб қолган ва жанжал вақтида ўзига тегишли “ИЖ-18” русумли ов қуроли билан унга бир марта ўқ узган.
Суд-тиббий экспертизанинг дастлабки хулосасига кўра, жабрланувчи оғир ўқотар жароҳатлари оқибатида ташқи қон кетишидан вафот этган.
Мазкур ҳолат юзасидан 12 февраль куни Нарпай туман прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилди. Гумонланувчи Жиноят-процессуал кодексининг 221-моддасига мувофиқ ушланган. Тергов ҳаракатлари олиб борилмоқда.
