Шаҳдам ва ишонч билан босилган қадам ҳар қандай кишининг эътиборини ўзига жалб этади. Айниқса, бу қадамлар аёл кишига хос бўлса… Аёлнинг қадам ташлашига қараб, унинг руҳияти хамда феълини билишингиз мумкин.
- Бўшашинг. Ўзингизга ташқаридан қиё боқинг. Ҳар доим киядиган пойафзалингизни кийиб, ойнанинг қаршисида туринг. Ўзингизга ёқишга ҳаракат қилиб эмас, балки доим қандай қадам ташласангиз шундай юринг. Қадамингизнинг катта-кичиклиги, қоматни тутиш, оёқ қўйишингиз ва ҳатто кўз қарашингизга ҳам аҳамият беринг. Қадам ташлашингиздан қониқдингизми? Энди эса бошқа қоидага кўра юриб кўринг. Аввал бўшашинг, ростланинг, елкаларингиз ва бошингизни кўтаринг. Аёллигингизни ҳис қилинг. Сиз барча бахтга лойиқ бўлган Аёлсиз! Энди эса қадам ташланг. Аёлнинг қадам кенглиги унинг оёқ ҳажми билан бир хил бўлиши керак. Албатта, илк онларда ўзингизни эркин ҳис қила олмайсиз. Тана бундай юришга кўникиши лозим. Агар машқ қилишдан эринмасангиз 2-3 ҳафтада тана мушаклари бундай юришга кўникади ва сиз эркин қадам ташлай бошлайсиз.
- Буксаларни ўйнатманг! Подиумда юриб кетаётган модел қизларга ўхшаб юришга ҳаракат қилманг. Аёлнинг буксалари бироз тебранмоғи керак. Мана шу тебраниш аёлнинг қадам ташлашига ўзгача жозиба беради. Баланд пошна кийганда аёлнинг буксалари енгил ҳаракатланади. Елкалар ҳаракатсиз, қўллар ҳам эркин ҳолда бўлади.
- Бошингизни кўтаринг! Бундай юришга кўникиш учун бошингизга китоб қўйиб у ёқдан-бу ёққа юриш ҳам мумкин. Доимо ёдингизда бўлсин: кишининг боши доим мағрур туриши, назари эса дадил, ишончли ва олдинга қаратилган бўлиши керак. Энгак билан бўйин бурчаги 90 даражадан кам бўлмасин. Бирор жойда қоқилиб кетмаслик учун эса, юраётган йўлингизга назар ташлашингизнинг ўзи кифоя.
- Шошилманг! Баланд пошнада юришни ўрганмагунингизга қадар бундай пойафзал кийманг.
- Қўлларнинг ҳаракати ҳам қадам ташлашга ўзгача бир жозиба беради. Юраётган пайтда қўллар танадан бироз олдинда бўлса, бу ҳаракатларда гўзаллик ўз аксини топади. Агар қўллар танага нисбатан озгина орқада бўлса, қадам ташлашингиз назокатли кўринади. Фақат аввал, буларни ойнанинг қаршисида машқ қилинг.
Манба: «SUG‘DIYONA» газетаси.
