ҚИЗЛАР УЧУН: НАФОСАТНИНГ 5 ҚОИДАСИ

Бизнинг қизлар, одатда, йигит кишининг эътиборини қозониш борасида бироз тортинчоқлик қилишади. Бунга, албатта, ҳаё, ибо, шарқона тарбия йўл қўймайди. Аслида-ку, шундай бўлгани ҳам яхши. Акс ҳолда қизларнинг ўзгалар эътиборини тортишга бўлган уринишлари енгилтак хатти-ҳаракатларга айланиб кетиши ҳеч гап эмас. Аммо буни ҳаёт, дейдилар. Ҳар ким ўз бахти учун курашиши, кези келганида ўзининг нималарга қодир эканини кўрсата билиши ҳам керак. Шу боис, “қизпошша”ларимизга айрим фойдали маслаҳатларни илинмоқчимиз.

Илк ҳаракат: пошналар сеҳри!

Аёл кишининг қомати идеал бўлиши, атир-упа ёрдамида қиёфасини мукаммал санъат асарига айлантириши, маликалардек кийиниши мумкин, бироқ оёғига қўпол пойабзал илиб олган бўлса, кимнингдир ҳавасини келтиришидаргумон! Пошнали туфлилар қаддимизни тик тутишга, ўзимизга ишонч ҳисси уйғонишига, нафис ҳаракатлар билан олға қадам ташлашга ундайди. Демак, пошналар сеҳрига ишонинг, у шаҳзодаларнинг тош юрагини эритишга қодир!

Иккинчи уриниш: ёрқин рангда кийининг!

Нега энди қора, кулранг сингари зерикарли, хира рангларга қоришиб юришингиз керак? Бозорга тушинг, атрофингизга бир назар солинг, ўзига ишонган қизлар барча рангдаги кўйлакларни яраштириб кия олади. Қорамағиздан келганингиз, бўйингиз паст ё тўлароқ эканингиз қорага бурканиб олиш учун баҳона бўла олмайди. Камчилик борми, уни тузатиш керак. Мабодо, ёрқин либосда кийинмаган бўлсангиз, ҳеч бўлмаса юз рангига мос ёрқинроқ лаб бўёғи суртишга уялманг. Агар у ёки бу услубга маҳкам ёпишиб олганлар сафида турсангиз, ҳар куни киядиган либосингиз қоматингизга мос бўлсин, рўдаполикдан қочинг. Бел чизиғи, оёқ шакли кийим ортидан ҳам билинар-билинмас сезилиб туриши керак.

Учинчи усул: табассум қилинг, та-бас-сум!

Совуққон моделлар образи аёллар учун мўлжалланган журнал муқовасигагина ярашади. Зеро, эркак зотига шундоқ ҳам иш билан боғлиқ муаммою ташвишларга тўла кун тартиби етиб ортади. Улар ҳар доим ёқимтой, самимий ва хушчақчақ аёлни кўришни исташади. Шу боис жозибали, гўзал кўринишни истасангиз, нимтабассум билан мулоқот бошлашни ўрганинг. Одатда, кўпчилигимиз “шу қиздан нима топибдийкин, чиройли бўлмаса?..”, деб ҳамманинг ҳавасини келтирадиган барно йигитлар танловидан ажабланамиз. Билмаймизки, ҳусни ўртамиёна бўлгани билан ўша қиз атрофдагиларга илиқлик, чиройли табассум улаша олади ва бу “услуб”ни ўз ўрнида қўллайди!

Тўртинчи қадам: нафисликка урғу беринг!

Маймоқ айиқдек қадам ташлайдиган ёки ўрдакдек лапанглайдиган, ёки бўлмаса, “бир нарсадан қуруқ қолгандай букчайволиб” (“Ишқдаги ишқ” фильми қаҳрамони Веранинг гапи) юрадиган ишчан аёл образи ҳеч қачон эркак кишининг эътиборини торта олмайди. Бундай қизларга фақат йўл бўшатиб, эҳтиром кўрсатишгина мумкин. Шундай экан, қадамни енгил ташлаб, бошни баланд кўтариш, баъзан эса хиёл эгилиб жилмайиб қўйишни ёддан чиқарманг. Курсига ўтираётганда шартта ўзингизни ташламанг ёки ниҳоятда қимтиниб, оҳистагина ўтириш ҳам у қадар тўғри эмас. Зеро, ишонч ва қатъият билан жой эгаллаб, суҳбатга киришишда гап кўп. Оёқларни қаерга, қандай жойлаштириш масаласида ҳам анчагина бош қотиришга тўғри келади. Энг яхшиси, маликаларга ўргатиладиган одат — икки оёқни жуфтлаган ҳолда бир томонга қиялатиб ўтиришдир.

Бешинчи йўл: ҳисларингизни ичингизга ютманг!

Аммо сохта кўз сузишлар, енгилтаклик билан қош қоқишлар ҳеч қайси қоидага тўғри келмаслигини унутманг! Ҳисларингиз, деганда, биз, ҳаётдан завқ олиш ва ён-атрофда содир бўлаётган воқеа-ҳодисаларгамуносабатингизни билдиришни назарда тутаяпмиз. “Музқаймоқ бунчаям ширин экан?”, “Мусаффо ҳаводан тўйиб нафас олгим келаяпти!”, “Қандай ажойиб байрам бўлаяпти, сизга ҳам ёқдими?”... Бу гапларда ортиқча ўйноқилик, хушомад йўқ ва бу билан сиз ҳаё чегарасидан чиққан ҳисобланмайсиз. Эркакми, аёлми, ким бўлишидан қатъи назар, унга суҳбатдошининг очиқкўнгиллиги, беғуборлиги ёқади. Соф туйғуларингизни содда ва самимийифодалашга уялманг!

Азиз дугонажонлар, бу чақириқлар орқали меҳрингизни қозонган йигитни ўзингизга жалб қила олмасангиз, хафа бўлманг. Шунчаки сиз ҳали ЯГОНА шаҳзодангизни учратмадингиз. Чунки у ҳам айни дам ўз маликасини бошқа ерлардан қидириб юрибди.

Азиза ҚУРБОНОВА тайёрлади.

Манба: «SUG‘DIYONA» газетаси