СОЧ ГУЛЛАШИГА ЙЎЛ ҚЎЙМАЙМИЗ!

Сочларингиз ҳам қариши мумкин! Ишонмайсизми? Чакки қиласиз. Чунки бу айни ҳақиқат! Айниқса, соч учининнг гуллашини эса бевақт тушган ажинга ўхшатиш мумкин. Демак, худди юз ва қўл теримиз каби сочларга ҳам алоҳида парвариш керак.

БОИСИ НИМАДА?

Бунинг бир қанча сабаблари бор:

• витамин етишмаслиги;
• нотўғри парвариш;
• кимёвий бўёқлар билан соч бўяш;
• соч фолекуласига мос бўлмаган шампунь ва ишқорли совунларда ювиш;
• шамол ва қуёшда кўп юриш;
• соч учун мўлжалланган лаклардан фойдаланиш;
• мунтазам бир хил турмак қилиш;
• фендан фойдаланиш;
• соч дазмолини кўп ишлатиш;
• темир тароқда тараш;
• соч тузилишининг зарарланиши;
• ёшга боғлиқлик ва ички организм касалликлари.

Сочни қайчилаш ечим эмас!

Муммодан қутилишнинг осон йўли гуллаган соч учини қайчилаш, деб ўйласангиз адашасиз. Бу энг сўнгги чорадир. Шошилманг! Аввало юқорида кўрсатилган сабаблар бор-йўқлигини аниқланг. Сўнг уй шароитида бажариш мумкин бўлган усулларни кўриб чиқинг.

(алоҳида)

Сочни қуритишда фен билан оралиқ масофа 20 см.дан кам бўлмасин. Шунда зарари камроқ бўлади. Ҳозирда фен таъсирини камайтирувчи воситалар ишлаб чиқилган бўлиб, улардан соч қуритишдан олдин бошга бир текис суртиб олинг.

Махсус ёғлар

Кокос, қора седана, канакунжут, зайтун, бодом ёғини 1 ҳафтада 1 маротаба сочингизга суртиб,бошингизни уқаласангиз бошдаги томирлар ҳаракатга келиб, сочларни ўсишига ёрдам беради. Мой нафақат сочларингизнинг илдизига, балки уч қисмига ҳам суртилганига амин бўлинг.

Парваришлаймиз

Тикловчи ва даволовчи шампунлардан фойдаланинг. Таркибида лецитин ва витамин В5 бўлганига эътиборингизни қаратинг, мойчечакли, ялпизли, оҳак гулли шампунлар ҳам айни сиз учун. Нотўғри танланган ёки кимёвий воситаларга бой бўлган шамьпунлар соч структурасини бузилишига олиб келади. Бунинг оқибатида соғлом сочлар ҳам зарарланади.

Тароғингиз катта тишли ва ораси яқин ҳамда тахта ёки елимдан ясалган бўлиши зарур.

Сочингизни ювиб бўлиб, унинг таг қисмига гуллашга қарши бўлган махсус крем, бальзамларни суртиб қўйсангиз ҳам фойдадан ҳоли бўлмайди. Бу крем ва бошқа суюқлик сочларга суртилгандан сўнг ҳудди ҳимояловчи плёнка каби қопланади ҳамда уни ташқи зарарлардан асрайди.

Таркиби турли кимёвий воситалариборат бўёқлардан эмас, табиий хинада сочларингизни бўяшга одатланинг.

Узун сочларни 1 ойда, калта сочларни эса 6-8 ҳафтада бир маротаба учидан озгинагина қирқиб, “енгилаб” туриш уларнинг соғлом ўсишига ёрдам беради. Буни уй шароитида эмас, сартарош ҳузурида ва унинг “қайноққина” қайчиси остида амалга оширган маъқул.

Уй шароитида ниқоблар

Ойда 2 маротаба сочингизни ювишдан аввал иссиққина компресс қилиш кони фойдадир. Бунинг учун кунгабоқар ёғини илитиб, сочларингизга суртасиз, устидан целофан кийиб, унинг устидан эса қалин рўмол ўраб қўясиз. 1 соат ўтгач шампунь билан ювиб, озгина миқдорда лимон шарбати аралашган нордонгина сувда чайиб ташлайсиз. Бундай усул барча турдаги сочларга мос келади.

Бундан ташқари гуллай бошлаган ёки гуллашни олдини олиш учун мойчечак қайнатмаси, қайин дарахти барглари ёки ялпиз баргларидан тайёрланган қайнатмаларда сочларингизни чайиб туринг.

Ёғли сочларга мос ниқоб: 1та тухум сариғи, 1 чой қошиқдан зайтун ёғи, хина кукуни, асал, коньякни аралаштириб сочингизга суртинг. 1 соатдан кейин ювиб ташлашингиз мумкин. Ушбу ниқобдан сўнг сочларингиз юмшаб, жилокорлиги яна ҳам ошади.

Қуруқ сочлар учун майонезли ниқобдан фойдланишингиз мумкин. Илитилган қатиқни ҳам ниқоб ўрнида ишлатсангиз бўлади.

Бу муҳим!

• Нам сочларни тараманг.
• Плойка, термо-бигуди ва бошқа сочларни куйдирувчи асбоблардан фойдаланманг.
• Сочларни текисловчи дазмолни ҳамда турли лак, мусс воситалар унутинг.
• Темирдан бўлган соч тўғноғич ва заколкалар ҳам зарарлидир.
• Қаттиқ совуқда, ёмғирдан, шамол ва тик қуёшдан панада бўлинг.
• Агар соч бўяшдан воз кеча олмасангиз, намловчи ва даволовчи ҳусусиятга эга бўлган бўёқдан фойдаланинг
• Маълум муддат кимёвий воситалардан умуман фойдаланманг.
• Ўз вақтида овқатланиш, меъёрида ширинлик, мева-сабзавотлар ҳамда ёнғоқ, кўкатлар истеъмол қилиб боринг.
• Танадаги сув миқдорини сақлаш ҳам катта аҳамияга эга.

КАМОЛА тайёрлади.

Манба: «Sug'diyona» газетаси