Кўпдан буён дийдорлашмаган дугонангиз билан шу бугун тушликда, ўша машъум қаҳвахонада учрашмаганингизда, вафодор умр йўлдошингизнинг бир қиз билан чақчақлашиб ўтирганини кўрмаган бўлармидингиз... Аммо тўхтанг! У ерда жанжал кўтариш сизга ярашмайди. Ортиқча ҳиссиётларга берилманг. Аксинча, айбдорларга яхшигина зарба беришга зимдан тайёрланинг!
Турмуш ўртоғингизнинг хиёнатига гувоҳ бўлганпайтингиз, биринчи навбатда: “Менга нима керак?”, деган саволга жавоб излашга ҳаракат қилинг. Энг қийини эрингизнинг бу “айб”ига ҳам қарамай севишингиз, оламда ундан яхшиси йўқлигига ишонишингиз. Агар шундай бўлса, оилани сақлаб қолишни истасангиз, оқилона йўл тутишга ҳаракат қилинг! Шундай қилингки, хиёнаткор “вафодор”ингиз бундан довдираб қолсин!
Жаҳлдан тийилган ютқазмайди
...Азизани таниб бўлмай қолди. У худди дунёни сув босса, тўпиғига чиқмайдиган одамга айланиб қолгандек эди. Яқинлари, ҳаттоки беш йил бирга яшаган эри — Рустам ҳам унга қараб лол эди. Айниқса, ўша кун... Турмуш ўртоғини машинасида бир қиз билан кўриб қолганидан сўнг Азиза бошини мағрур тутганча терс бурилиб кетди ва бошқа йўлдан юришга аҳд қилди.
Сўнгги бир неча ҳафталар давомида эр рафиқасидан жанжал кўтариши, уни саволларга тутиши, азобланиши, ҳеч бўлмаганда йиғлашини кутганди. Аксига олиб, хотини тамоман сукутда. Бу жимжитликдан қутулиш учун у нимадир қилиши кераклигини ўйларди. Айбини ювиш, оиладаги хотиржамликни сақлаб қолиш ва Азизани хурсанд қилиш учун Рустам ўйлай-ўйлай уйни таъмирлаш ишларини бошлаб юборди. Кейин эса ёз келганида иссиқ ўлкалардан бирига саёҳат йўлланмасини совға қилди. Бу пайтда эса Азиза “жаримага тортилган” эридаги ижобий ўзгаришларни жимгина кузатишда давом этди...
Айбдорлик ҳисси оилага фойда келтирса, эркак кишининг хиёнат кўчасига киришига йўл қўймаса, бунга қаршилик қилмаслик лозим...
Эр — ярим пирми?
Эрни ҳурмат қилиш, унга итоат этиш рафиқанинг бурчи, бироқ бутун олам эр атрофида айланмаслигини ҳам тушуниш лозим. Одатда, биз — аёллар бутун борлиғимиз ва ҳаётимизни турмуш ўртоғимизга бағишлаймиз. Унинг атрофида парвона бўламиз, вақти келса, истагига кўра, ўз орзуларимиздан воз кечамиз. Бироқ меҳримиз ва ишончимиз эвазига хиёнат билан жавоб қайтарилса-чи?
... Институтни икки боласи билан бир амаллаб битириб олган, учинчи фарзанди тўрт ойликка тўлган Мастуранингюрагига пичоқ санчилгандек бўлди... Эри Илҳом унга вафосизлик қилди. Қалбининг тубидан отилиб чиққан “Қачонгача сабр қилиш мумкин?”, деган оғриқли ҳайқириқ бора-бора уни ўзгартирди. Турмуш ўртоғидан нима учунлигини сўраманг, дея яхшигина пул олди. Фарзандларини қайнонасига топшириб, йиллар давомида унут бўлган маскан — гўзаллик салонига ошиқди. Қайтишда бир неча дўконга кириб, ўзига ёққан, илгари олишга иймангани ёрқин рангли кийимлардан харид қилди. Аёл киши ўзи ҳақида қайғуриши ва эътибор бериши кераклигини у энди тушуна бошлаганди. Шу боис қайнонаси билан маслаҳатлашиб, мутахассислиги бўйича иш қидирди, эрининг хиёнатини эса эсламасликка уринди. Ташқи кўринишини яхшилаш ва уйдан чалғиш мақсадида фитнес клубга аъзо бўлди. Мастуранинг руҳан тетиклашгани, дилбар аёлга айлангани эрига фақатгина ижобий таъсир қилди. Ёнгинангда шундай гўзал бўлса-ю, вақтинг, эътиборингни кўчадаги енгилтакларга ажратасанми, киши?! Йўқ, албатта. Буни вақтида тушунган Илҳом рафиқасининг севгиси ва ишончи учун кураша бошлади.
Рақиб томон қадам ташланг!
Лоланинг тутган йўли таҳсинга сазовор! Мулойим ва хушчақчақ аёл бўлгани учун бошқа дугоналаридан фарқли ўлароқ, эрнинг жазмани ҳам инсон эканлигини унутмади. Ва зудлик билан душманига яқинроқ бўлиш тараддудини кўрди.
Ўша ёшгина жувон билан илк учрашувлари эри — Ботирнинг офисида бўлганди. Эрининг ишхонасига огоҳлантирмай кириб борган Лола Ботир аканинг ёнида сузилибгина турган қизга дуч келди.
Иккинчи учрашув шаҳар марказидаги қаҳвахоналардан бирида бўлиб ўтди. Қаттиқ асабийлашаётган аёлсочларини ҳеч ким юлмаётганига ҳайрон эди. Суҳбат давомида аёлнинг пулга муҳтожлиги маълум бўлди, шунга кўра, унга Ботир ака эмас, балки унинг бойлиги керак экан. Қиз данғиллама уй, иккала машина ҳамда банкдаги ҳисобрақами Лоланинг номида эканлигини билгани заҳотиёқ, ошиғидан осонгина воз кечди, яъни бошқа бировнинг машинасига ўтириб кетадиган одат чиқарди.
“Мендан бошқа кимга ҳам кераксан!”
Эркаклар рафиқаларига хусусий кўчмас мулкларига қарагандек муносабатда бўлишга одатланишган. Уларнинг наздида, эр бошқа гулларни ҳидлаб келгунига қадар хотин худди ҳайкал каби бир жойда қимир этмай тураверади. Афсуски, бу янглиш фикр!
Нафосат опа эрини деса жонини беришга ҳам тайёр эди. У билан бирга кечган ўттиз йил ичида бирор марта ажрашишни истамади. Бироқ ҳамиша ҳам ҳаёт кўргуликларига бизнинг хоҳиш-истакларимиз тўғри келавермас экан. Эри — Азимжон хотинининг оиласи бузилган дугонаси билан яқин муносабатда экани маълум бўлганидан сўнг Нафосат опа қаттиқ азият чекди, руҳи эзилди. У дугонасидан шу заҳотиёқ воз кечди, бироқ эри учун курашни бошқачароқ усулда қўллади. Ўша машъум кундан бир ҳафта ўтгач, уйдаги компьютеридан интернетга кириб, ижтимоий саҳифанинг аъзосига айланди. У ердан мактабдошлари ва курсдошларининг бир қанчасини топди. Орадан ҳеч қанча вақт ўтмай, синфдошлари билан учрашувга ясан-тусан қилиб отланаётганида Азимжон хотинидан хавотирга тушиб қолди. Ва уни йўқотмаслик учун ўзгаришга қарор қилди.
Севган, суянган, жонингни фидо қилишга тайёр, ўзингга инонгандек ишонган инсонинг ортингдан келиб, пичоқ санчишига бардош бериш жуда қийин. Буни фақат бошидан ўтказганларгина билади... ҳеч бир оилани хиёнат аталмиш кўргулик барбод қилмасин, болалар тирик етимга айланмасин!
Манба: "SUG‘DIYONA" газетаси
