ВАҚТНИ НАЗОРАТ ҚИЛИШ БОРАСИДА 8 ТАВСИЯ!

Айтайлик, бир неча кундан сўнг таваллуд айёмингиз яқинлашаётган бўлса-да, кайфиятингиз ҳавас қилгудек эмас. Сабабини айтайми? Сиз «Яна бир ёшга қарияпман», деб хафа бўлаяпсиз. Топдимми? Бироқ ёшингизга ёш қўшилиши сизга бундай таъсир этмаслиги керак. Чунки вақтни назорат қила олсангиз, 30, 40 ёшга кириб ҳам атрофдагиларнинг мақтовларидан баҳраманд бўлаверасиз. Бунинг учун эса албатта бир неча қоидаларни ўрганиб, уларга амал қилинг.

1. Ҳар тонгни фақат яхши кайфият билан бошланг! Машойихлар айтганидек, кунни қандай бошласанг, бир кунлик ҳаётинг ҳам шундай ўтади.

2. Ўзингизни севинг! Ахир ташқи кўринишингиз ички оламингизга мос келиши учун нафақат бошқалар эътирофи, балки ўзингиз ҳам буни қалбан ҳис этишингиз керак. Ёшингиздан уялманг, зеро, умр ёши инсоннинг қариётганини эмас, унинг ҳаётий тажрибаси нечоғлик бойлигини англатади.

3. Фикрларингиз, қарашларингиз тўғри ё нотўғрилигини ўйлаб ўтирмай, яхшиси, улар ҳақида бошқаларнинг ҳам фикрини тингланг. Эҳтимол, сизни ўйлантираётган масаланинг ечими жуда осондир-у, буни илғамаётгандирсиз.

4. Бир хил қолипга тушиб қолманг. Бу нафақат ташқи кўринишингиз, балки ўқиш, иш ва қизиқишларингизга ҳам тегишли. Мисол учун, бу ой бирор китобни мутолаа қилсангиз, келаси ойга бошқасини танланг. Либосингиздаги рангларга ҳам аҳамият беринг. Турли ранглар билан тажриба ўтказишдан чўчиманг.

5.Ишда ва уйда жиҳоз, буюмларнинг ўрнини алмаштириб, янгилик киритиб туринг. Бу ҳам кечаги кун ортда қолганини, олдинда янги-янги ғоялар борлигини билдиради.

6.Бу йилги туғилган кунингизни ўзгача тарзда нишонланг. Ҳар йили бир хил кўринишда такрорланадиган дастурхону тадбирлардан зерикмадингизми? Дастурхонни янгича кўринишда безанг, ўзингиз ҳам ҳар доимгидан ўзгача кўринишда бўлинг. Сизни кўрганлар «Неча ёшга кирдингиз?» деб ҳайратларини яширолмасин.

7.Кайфиятингиз доим кўтаринки руҳда бўлишини таъминланг. Бунинг учун эса ўзингизни «ҳаммаси яхшиликка!» дея ишонтиринг. Шундагина сиздаги ишонч вақт ва масофа танламайди.

8.Бошқаларникидан фарқланадиган ҳаётий шиор ўйлаб топинг. Иложи бўлса, улар бир нечта бўлсин. Чунки биттаси билан чегараланиб қолганингиз билан бошқалари ҳам ўз-ўзидан келиб чиқаверади-да!

Манба: «SUG‘DIYONA» газетаси.