— Кекса ёшли кишиларда панкреатет касаллигининг муолажаси қандай кечади? Қабул қилаётган дори воситалари акс таъсир кўрсатмайдими, шу ҳақида батафсил маълумот берсангиз?
Маҳлиё Отаниёзова, Хива шаҳри
Нодира ҲАМРОЕВА , терапевт:
— Ошқозон ости безининг яллиғланиши сабаб келиб чиқадиган панкреатит жиддий касалликдир. Бунда ошқозон ости бези ишлаб чиқараётган, ҳазм фаолияти учун зарур бўлган ферментлар ўн икки бармоқли ичакка тушмай қолади ва ўз-ўзини емира бошлайди. Фермент ва заҳарли моддалар қонга тушиб, бошқа ички аъзолар фаолиятини ҳам издан чиқариши мумкин. Ошқозон ости бези қонда қанд миқдорининг ошиб кетмаслиги учун масъул бўлгин инсулин гормонини ишлаб чиқариши билан ҳам аҳамиятлидир. Панкреатит, ўт пуфагива меъда касалликлари, узоқ муддат дори воситаларини қабул қилиш, ошқозон ости безининг шикастланиши, нотўғри овқатланиш, қандли диабет асоратида келиб чиқиши мумкин. Асабийлик, кучли стресс, ёғли ва қаттиқ қовурилган таомлар истеъмолиэса хасталик хуружларини пайдо қилади. Муолажа тўғри бажарилиши учун волидангиз шифокор буюрган ферментатив дори препаратларини ўз вақтида қабул қилиши ҳамда овқатланиш тартибига амал қилиши лозим. Панкреатитдан азият чекувчи беморлар ёғли ва қовурилган егуликлар ҳамда таркибида кофеин моддаси бўлган ичимликларни чеклашлари лозим. Касаллик қўзғаган пайтда газсиз сув ва наъматак шарбати ичиб турилиши мумкин. Хуруж енгиллашгач, оз-оздан таомланса бўлади.
