Энг аввало, нима истаётганингизни пухта ўйланг ва қуйидаги саволларга жавоб излаб кўринг: орзунгиз амалга ошишига руҳан тайёрмисиз? Унинг рўёби йўлида нималар қила оласиз? Тасаввур қилинг, сиз “Миллиард сўмим бўлсайди”, деб ният қилдингиз. Бир ойликдан иккинчи маошгача етиб олишга одатланган сиздек одам бундай оғир “юк”ни кўтара олармикан? Катта маблағни тўғри тақсимлаш ва ишлатиш қўлингиздан келармикан? Шу хусусда ўйланг.
Ўйлай-ўйлай, бир тўхтамга келдингиз. Мана, энди, истаклар сари дадил қадам ташлаш фурсати етди. Биринчи галда орзуларингиз ҳақида ўйлаётиб, “эмас” ёки “-май-” инкор қўшимчаларини ишлатмасликка тиришинг. Негаки, сизу бизнинг ҳар бир фикримиз самога етиб бориб, яна ўзимизга моддият бўлиб қайтади. Шунинг учун “Касал бўлишни истамайман” эмас, “Шукурки, мен соппа-соғман, ҳар куни эрталаб мусаффо осмонни, кулиб боқаётган офтобни кўриш бахтига муяссарман”, дейиш керак.
Ниятингиз ҳақида сўзлаётиб, ҳозирги замон феълида гапирганингиз маъқул. Масалан, “Денгизда ҳордиқ чиқаришни орзу қиламан”, дегандан кўра, “Бу йилёз фаслида денгизга дам олиш учун бораман!”, деган афзалроқ. Орзуга айб йўқ, дейдилар, бироқ у аниқ мақсадга йўналган бўлса, амалга ошиши осон кечади.Истагингиз бир кун келиб, албатта, амалга ошишига ишонинг.
Ўзингизни, худдики, унга бугун-эрта ОРЗУНГИЗГА етишадигандек тутинг. Шоду хуррам яшашни истасангиз, омадни қўлдан бермасликка бугундан ҳаракат қилинг. Бахтли бўлишни орзу қилсангиз, ҳозирданоқ юзингизда табассум пайдо бўлсин. Ахир, бахтли инсон гўзал табассуми билан ўзгалардан ажралиб туради.
Орзунгиз ҳақида эртадан-кечгача ўйлашдан ташқари унинг амалга ошиши учун ўзингиз нима қилишингиз кераклигини ҳам ўйланг. Масалан, “Қайнота-қайнонамдан алоҳида яшашни истайман”, десангиз, бу ҳолда ижара уй ҳам алоҳида яшаш учун жой бўлиши мумкин. Шу боис “Ўзимнинг шахсий уйим бўлсин”, дейишни унутманг.
Истакларни тасаввурингизда жонлантиринг, бунинг учун қулай вақт уйқу олди ҳамда эрта тонгдир.
Орзуларингизга аталган алоҳида ён дафтарча тутганингиз маъқул. Имкон қадар унинг муқовасидаги сурат истакларингизга мос бўлсин. ҳар бир ниятни унга муҳрлаб боринг. Тагигаорзунгиз амалга ошган куннинг расмини чизиб қўйсангиз, янада яхши.
Борига шукур қилишни ҳам билиш керак. Шунда келажак ҳаётдаги яхши-ёмон янгиликларни ортиқча қийинчиликсиз қабул қила оламиз.
