"Даракчи" газетасининг "Ўзбегим ошхонасига" лойиҳасининг меҳмони баъзи аёл санъаткорлардан фарқли ўлароқ, ошхонада доим ўз қўли билан таом тайёрлайдиган хонанда Амира АЛИБЕКОВА…
2 КИШИЛИК ТАОМ учун зарур масаллиқлар:
- 300 гр. товуқ тўши,
- 200 гр. шампиньон,
- 240 гр. қаймоқ,
- 150 гр. гуруч,
- 1 та пиёз,
- 30 гр. ўсимлик ёғи,
- Туз, қора мурч ва ўзига хос таъм берувчи зираворлар: вигета ва орегано.
Тайёрланиши:
1-жараён:
Пиёз ва товуқ гўшти тўртбурчак шаклда тўғралади. Қўзиқоринлар 4 бўлакка бўлинади.
Ўсимлик ёғида пиёз «ўлгунича» қовирилиб, устига шампиньон солинади. Озгина қовурилгач, товуқ гўшти солинади. Қовуриш жараёнида тагига олаётганини сезсангиз, озгина сув қуйинг.
Таъбга кўра туз ва зираворлар солиб, сувини шимгач, устидан қаймоқ қуйилади.
Қаймоқ аввал суюлиб, сўнг қуйилади.
Таомингиз суюқроқ ҳолда бўлишини истасангиз, озроқ қовурасиз, қуюқроқ бўлишини хоҳласангиз кўпроқ.
2-жараён:
Гуручни аввал 30 грамм сариёғ ва 10 грамм ўсимлик ёғида қовуриб оласиз.
Сўнг устига қайнаб турган сув қуйиб, 10 дақиқага димлаб қўйилади. Иккинчи усул: тузли сувда гуручни табга кўра қайнатиб олиб, сўнг сарёғ қўшса ҳам бўлади.
3-жараён:
Гуручни исталган шаклга келтириб, ёнига қовурилган товуқни солиб, кўкатлар билан безатасиз.
АМИРАДАН ФОЙДАЛИ МАСЛАҲАТЛАР
Ошхонада...
- Қовуриш учун одатда қийма, антрекот (молнинг қовурға гўшти), уриб юмшатилган гўшт, ромштекс (бир парча қовурма мол гўшти)дан фойдаланилади. Гўштни баланд оловда, сўнг қопқоқни ёпиб қовиринг.
- Товуқ қиймасидан «фрикаделька» тайёрлаш мумкин. Бунинг учун майда тўғралган пиёз, таъбга кўра зираворлар солиб, қўлни хўллаб думалоқ ҳолатга келтиринг. Тухум солиш шарт эмас, чунки шундоқ ҳам ёпишади.
- Қаттиқ гўшт ёмшоқ бўлиб пишишини истасангиз, қайнатаётган сувингизга озгина сирка қўшинг.
- Котлетга кўп нон қўшсангиз, ёғли бўлиб қолади. Чунки нон қовуриш жараёнида ўзига кўп ёғ шимади.
Садоқат АЛЛАБЕРГАНОВА тайёрлади. Фотомухбир: Ислом РЎЗИЕВ
