— Бўйин остеохондрозидан азият чекаман. Бу нохуш касаллик ривожланган даврида қандай даволаш мумкин?
Т.Қодиров, Тошкент шаҳри
Мунира АЛИЕВА, шифокор-невропотолог:
— Остеохондроз учун белдаги оғриқ бу табиий ҳол. Ҳозирда бўйин остеохондрози касаллиги энг кўп тарқалган касалликдир.
Остеохондроз касаллигининг хусусиятлари:
Бўйин остеохондрози бел ва кўкрак остеохондрозидан бир қанча фарқ қилади. Умуртқанинг бўйин қисмидаги поғоналари тузилишининг ўзи ҳар хил бўлиб, улар белнинг бошқа қисмидаги поғоналардан кичикроқ бўлади. Бўйин, умуртқа поғонанинг энг ҳаракатчан қисми бўлиб, у бошни тутиб тургани сабабли доим оғирлик тушади.
Бундан ташқари, тананинг бўйин қисмида бир қанча асаб томирлари ҳамда умуртқа артерияси ўтади. Унинг вазифаси орқа мия қон томирларини, узунчоқ мияни қон билан таъминлаш. Умуртқа артерияси босилганда бел ва бош мия ишемияси содир бўлиши мумкин ва инсультга олиб келиш эҳтимоли бор. Танадаги ҳаракатнинг ўзгариши, бош айланиши, кўзнинг хиралашиши ва эшитиш қобилиятининг сусайиши артериянинг шикастланганлигидан далолат беради.
Шикастланган тўқималар ҳажмининг кўплиги ва иш функциясининг сезиларли пасайиши умуртқанинг бўйин қисмидаги орқа мия эзилганлигидан дарак беради ва остеофитлар пайдо бўлади. Юзага келган остеофитлар муаммони янада чуқурлаштиради. Бўйин остеохондрози шишиш ва асаб илдизининг яллиғланишига олиб келувчи умуртқа поғонаси грижаси ва протрузиясига олиб келади. Бунинг оқибатида яллиғланган илдиз бутун умуртқа поғонаси каналини эгаллайди ва касаллик белгиси — оғриқ пайдо бўлади.
Даволашни қачон бошлаш керак?
Бу касалликни уй шароитида даволаш нотўғри қарор бўлиб, ёмон окибатларга олиб келиши мумкин. Бу касалликдан халос бўлиш учун шифокорга мурожаат қилинг. Касаллик эрта аниқлангандагина даволаш самарали кечади. Касаллик кеч аниқланганда даволанишнинг асосий мақсади оғриқдан халос бўлишга қаратилади.
