Фарзандим болаликдан ногирон. Ўзим ҳам 3 гуруҳ ногирониман. Рўзғор учун ижарага жой олиб, новвойчилик билан шуғулланаман. Менинг ҳам, ўғлимнинг ҳам ногиронлигини ҳисобга олган ҳолда солиқдан имтиёз бўладими?
Мукамбар Тўлаганова, Тошкент шаҳри, Шайхонтохур тумани
Н.Норбаев, Ўзбекистон республикаси Давлат Солиқ қўмитасининг раиси ўринбосари:
—Ўзбекистон Республикаси Солиқ кодексининг 311- ва 375-моддаларига асосан солиқ тўловчининг календарь ойида ишлаган кунлари сонидан қатьи назар, якка тартибдаги тадбиркорлар томонидан қатъий белгиланган солиқ тадбиркорлик фаолиятининг тури ва солиқ тўловчининг фаолиятни амалга ошириш жойига қараб белгиланган ставкалар бўйича ҳамда суғурта бадали ойига энг кам иш ҳақидан кам бўлмаган миқдорда тўланади.
Шунингдек, ёшга доир пенсия олиш ҳуқуқига эга бўлган шахслар, шунингдек I ва II гуруҳ ногирони бўлган шахслар учун суғурта бадалининг миқдори унинг белгиланган энг кам миқдорининг камида 50 фоизини ташкил этиши керак. Мазкур имтиёзлар пенсия гувохномаси ёки тиббий-меҳнат комиссиясининг маълумотномаси асосида берилади.
Шу билан бирга, амалдаги қонун ҳужжатларига асосан ногирон бўлган жисмоний шахслар учун якка тартибдаги тадбиркорлик фаолияти бўйича қатьий солиқдан ҳамда мол-мулкни ижарага олувчи шахсларга ижара тўловидан имтиёз берилиши назарда тутилмаган.
