БМТ ВАКИЛИ АҲМАД ШАҲИН БУХОРОГА БОРДИ

Мамлакатимизга расмий ташриф билан келган БМТ Инсон ҳуқуқлари бўйича кенгашининг дин ва эътиқод эркинлиги масаласи бўйича махсус маърузачиси Аҳмад Шаҳид бошчилигидаги делегацияси аъзолари 7 октябрда Бухоро вилоятида бўлди.

Меҳмонлар вилоятга ташрифини ислом оламида машҳур нақшбандия тариқатининг йирик намояндаси Баҳоуддин Нақшбанд меъморий мажмуасини зиёрат қилишдан бошлади. Улуғ пир қабри олдида Қуръон тиловат қилинди.
БМТнинг Инсон ҳуқуқлари бўйича кенгашининг дин ва эътиқод масаласи бўйича махсус маърузачиси шу ерда вилоятнинг бир гуруҳ имом хатиблари билан мулоқотда бўлди. Унда ислом тинчлик ва эзгулик дини экани таъкидланди. Ер юзининг турли нуқталарида экстремистик оқимлар ўзларининг ғаразли мақсадлари йўлида исломни нотўғри талқин қилиб, дунё жамоатчилигида муқаддас динимиз ҳақида бузғунчилик ва қўпорувчилик манбаи сифатида тасаввур уйғотишга ҳаракат қилмоқда. Шу ниятда, айниқса, ҳали оқ-қорани яхши ажратолмайдиган ёшлар онгини заҳарлашга уринаётир. Мамлакатимизда жаҳолатга қарши маърифат билан курашишга қаратилган турли маърифий-тарбиявий тадбирлар олиб борилмоқда.
Аҳмад Шаҳид бошчилигидаги делегация аъзолари Бухоро вилояти ҳокими Ў.Барноев билан учрашди. Меҳмонларга фуқароларнинг конституциявий ҳуқуқлари, қонуний манфаатларини таъминлаш борасида амалга оширилаётган ишлар, бунда вилоят, туман ва шаҳарлардаги Халқ қабулхоналари муҳим ўрин тутаётгани тўғрисида сўзлаб берилди. Халқаро нуфузли ташкилот вакиллари ўзларини қизиқтирган саволларга жавоб олди.
Меҳмонлар қадимий Масжиди Калонда ҳам бўлди.
Бухоро вилоятида учта диний таълим муассасаси – Мир Араб олий мадрасаси, Мир Араб ўрта махсус ислом билим юрти, Жўйбори Калон аёл-қизлар ўрта махсус ислом билим юрти фаолият кўрсатмоқда.
БМТ Инсон ҳуқуқлари бўйича кенгашининг дин ва эътиқод эркинлиги масаласи бўйича махсус маърузачиси ва делегацияси аъзолари Мир Араб ўрта махсус ҳамда Жўйбори Калон аёл-қизлар ўрта махсус ислом билим юртларида бўлиб, толиби илмлар ва мударрислар билан учрашди. Мир Араб ўрта махсус ислом билим юртида қадимий хаттотлик санъати намуналари ва толибларнинг “устоз – шогирд” анъанаси асосида араб ёзувининг турфа усулларини пухта эгаллаётгани билан танишди. Аёл-қизлар ислом билим юртида талабаларнинг дарс машғулотларидан сўнг миллий халқ ҳунармандлиги тўгарагида шуғулланиб яратган зардўзлик ва патдўзлик буюмлари кўргазмасини, иш жараёнини кўздан кечирди.
Меҳмонлар ташриф доирасида Бухоро шаҳридаги Аҳмад Дониш номидаги маҳалла фуқаролар йиғинида бўлди. Бу ерда 7 миллат вакиллари аҳил ва ҳамжиҳат истиқомат қилади. Диний амаллари турлича. Лекин маҳалланинг ижтимоий-иқтисодий масалалари, ёшлар тарбиясига бутун жамоатчилик масъул.
Аҳмад Шаҳид бошчилигидаги делегация аъзолари маҳалла фаоллари, турли маданий марказлар вакиллари билан учрашувда ўзларини қизиқтирган барча саволларга жавоб олди.