Аёл учун оналик бахтига тенг келадигани йўқ. Бироқ айрим ҳолатлар борки, бунда ҳомиладорлик келгусидаги асоратларнинг олдини олиш учун ҳам тавсия этилмайди. Зеро, соғлом фарзанд кўриш учун аёл саломатлиги ҳам шунга мос бўлиши лозим. Айрим ҳолларда турмушга чиққан қизлар организмидаги ўзгаришлар кутилмаганда турли касалликларни юзага келтиради. Қуйида ана шундай хасталиклар ҳақида суҳбатлашамиз.
Эпилепсия (тутқаноқ)
Бу касалликнинг белгилари бош мия фаолияти билан боғлиқ бўлиб, тутқаноқ тутиши ва тез-тез ҳушдан кетиш билан ифодаланади. Эпилепсия ташхиси қўйилган аёлларга ҳомиладорлик тавсия этилмайди. Бироқ касалликнинг даражасига қараб ҳамда мунтазам муолажалари билан биргаликда ҳомиладорликка эришиш мумкин. Нохуш ҳолатларнинг олдини олиш учун касаллик қанча эрта аниқланиб, даволанса, шунча яхши.
Юрак пороги (юрак пульси ўзгариши, нафас қисиши, қон айланишининг бузилиши)
Агар юрак фаолиятининг бузилиши билан боғлиқ хасталиклар аёл саломатлиги учун хавф туғдирса, ҳомиладорлик тавсия этилмайди. Бу ҳолатда юрак фаолияти ҳомилани кўтара олмай, етарли қувват билан таъминлай олмайди. Бунинг таъсирида эса бошқа ўзгаришлар ҳам келиб чиқиш эҳтимоли мавжуд.
Юрак фаолияти билан боғлик касалликларда аёл аввал тўлиқ даволаниб, бир қатор текширувлардан ўтиши керак. Агар шифокор томонидан ҳомиладорлик таъқиқланса, таваккал қилиш ярамайди.
Қандли диабет
Мазкур касалликнинг ҳомиладорлик учун мумкин бўлмаган қуйидаги µолатлари мавжуд. Булар:
- Ота-онанинг иккаласида ҳам қандли диабет мавжуд бўлса, туғилажак болада касалликнинг эрта бошланиш хавфи юзага келиши мумкин.
- Касалликнинг ривожланиш жараёнида организмда унинг асоратлари юзага келганда;
- қандли диабет таъсирида юзага келган бошқа турдаги касалликларда ҳомиладорлик тавсия этилмайди.
! Касаллик ҳолатига аниқ баҳо бериш учун малакали шифокор текширувидан ўтиб, керакли хулосага эга бўлиш лозим. Касаллик даражаси соғлом ҳомилани дунёга келтириш учун тўсқинлик қилмаслиги мумкин. Бироқ шунда ҳам аёл организми учун жиддий таъсир этиши эҳтимоли йўқ эмас.
Камқонлик
Ҳомиладор бўлмаган аёл ҳам ҳар олти ойда текширувлардан ўтиши керак. Текширув жараёнида қон таҳлили, жумладан, гемоглобин миқдори ўлчанади. Агар аёл организмида камқонликнинг ҳомиладорликда тақиқланувчи даражалари аниқланса, фарзанд кўриш тавсия этилмайди. Шунингдек, сурункали ва ўткир лейкоз хасталигида ҳам ҳомиладорлик касаллик авж олишига олиб келиши мумкин. Бордию хасталикни бошдан кечираётган даврда ҳомиладорлик юзага келса, муолажалар ҳомиланинг соғлом ривожланиши учун салбий таъсир кўрсатиши эҳтимоли мавжуд.
Асаб тизими билан боғлиқ хасталиклар
Ҳомиладорлик маън этилувчи асаб тизими билан боғлиқ хасталиклар қаторига наслий, дегенератив ва нерв тизимидаги шамоллаш µолатларини киритиш мумкин. Мазкур касалликлар мавжуд бўлган ҳолатда ҳомиладорлик юз берса, бу соғлом фарзанд кўриш имконини бирмунча камайтиради. Жумладан, миопатия, миастения, склероз касалликларида ҳомиладорлик тавсия этилмайди. Бироқ айрим асаб касалликларининг енгил ва даволанувчи турида фарзанд кўриш имконияти сақланиб қолади.
- Манба: «SUG‘DIYONA» газетаси.
