Мутахассис – кардилог Раъно Ғуломова
Қуйидаги белгиларга ўз вақтида жиддий аҳамият бериб, шифокор кўригига шошсангиз, кутилаётган юрак хасталикларининг олдини оласиз.
1. Чарчоқ. Эндигина уйқудан турган бўлсангиз ҳам, ўзингизни тун бўйи мижжа қоқмагандек тасаввур қиласиз. Ишга етиб олиб, фақатгина дам олиш xақида ўйлайсиз. Уйга эса зўрға келасиз-у ўзингизни ётоққа отасиз. Ва кунлар ўтгани сайин чарчоғингиз ортаверади.
- Бу юрак фаолиятида етишмовчиликдан дарак. Чарчоқ мия, ўпка ва юракда қон айланишининг сусайганидан келиб чиқади.
2. Кучсизлик. Юрак хуружини бошдан кечирган кўпчилик инсонлар, бу ҳодиса юз беришдан олдин ҳаттоки бир вароқ қоғозни ушлашга ҳам кучлари етмаганини айтишади.
- Бу яқин соатларда ёки дақиқаларда миокард инфаркти юз беришидан дарак.
3. Ҳарсиллаш. Агар 3-қаватга кўтарилиш xудди бир соатлик югуриш марафонидан кейинги ҳарсиллашни пайдо қилса ёки кичик жисмоний машқлар бажарганда нафас сиқилса, кардиологга мурожаат қилиш вақти келди.
- Қон айланишининг ёмонлашуви, унинг ўпкага етиб боришини қийинлаштириб, қисқа нафас олишни чақиради.
4. Совуқ тер. Ўтирган жойингизда бирданига xудди 2 соат машғулотлар залида машқ қилгандек, бутун танангизни муздек тер қоплашни бошлайди.
- Юрак хуружи бошланишидан олдинги огоҳлантирувчи белги.
5. Томир уришининг тезлашуви. Онда-сонда юз берадиган томир уришининг тезлашуви хавф туғдирмайди. Тез-тез кузатилувчи томир уриб кетиши ҳарсиллаш, бош айлиниши ва ҳолсизлик билан бирга кузатилса, сиз аритмия касаллигига йўлиққансиз.
- Аритмия касаллиги инфарктнинг сабабчисидир.
6. Кўкрак қисмида оғриқ. Тўсатдан пайдо бўлади-ю xудди шундай қайтиб кетади. Шунинг учун кўпчилик бунга аҳамият бермайди ҳам. Оғриқ қўл, бел, елкагача тарқалгандагина xато қилганларини биладилар.
- Юрак хуружи яқинлигидан огоҳлантирувчи энг кенг тарқалган белги.
7. Шишиб кетиш. Оёқлар шишиб кетиши, шунингдек, ортиқча вазн пайдо бўлиши ҳар доим ҳам семириш аломати эмас. Юрак ҳам шу сигналлар орқали сизни огоҳлантириши мумкин. Шишлар пайдо бўлганда иштаҳа йўқолиши ҳам кузатилади.
- Организмдаги ортиқча суюқлик юрак етишмовчилигидан дарак.
- Манба:
«Sug'diyona» газетаси
