— Ўғлим ўнг қўл тирсаги билан йиқилиб тушганди. Оз-моз тери кўкариши юз берганига, у қадар ваҳимали эмас, дея эътибор қилмабмиз. Ҳадеб, “Қўлим оғрияпти”, деяверганидан сўнг шифокорга олиб борсак, “Тирсагида қон қотиб қолган, жароҳат асорати бу”, дейишди. Шунақаси ҳам бўлиши мумкинми? Қотиб қолган қоннинг тарқаганини қаердан биламиз кейин?
Диёра Мамарасулова, Самарқанд вилояти
Сунатилла ЙЎЛЧИЕВ, спорт шифокори:
— Жароҳатдан кейинги ҳолатга баҳо беришда албатта рентген текшируви ўтказилиши лозим. Қўл тирсак қисмининг шикастланиши натижасида гемартроз, яъни қон қотиб қолиши юзага келган бўлса, шифокор назоратида керакли даво чоралари ўтказилади. Уй шароитида болага осойишта муҳит керак, кўпроқ дам олиши, кескин ҳаракатлардан бир муддат сақланиши талаб этилади. Оғриқни енгиллаштириш учун қўлни ортиқча уринтирмаслигига эътибор беринг.
