29 май куни Тошкентдаги Турин политехника университети очиқ эшиклар кунини ўтказади. Бундан мақсад ушбу олий ўқув юртига кирмоқчи бўлган абитуриентларни университет фаолияти билан таништиришдан иборат.
Gazeta.uz нашрининг хабар беришича, ҳозирда университет 2014/2015 ўқув йиллари учун ҳужжатлар қабул қилмоқда. Қабул 15 июнга қадар давом этади. Бу йил университет бакалавриатга 175 нафар талаба қабул қилади.
Университетга кириш истагида бўлган абитуриентлар 15 апрелдан 15 июнгача он-лайн рўйҳатдан ўтишлари лозим. Он-лайн рўйҳатдан ўтмаган абитуриентларнинг ҳужжатлари қабул қилинмайди ва улар кириш имтиҳонларига киритилмайди.
Кириш имтиҳонларини ўтказиш санаси 30 июндан 12 июлгача аниқланади. Тест натижалари 6 августга қадар эълон қилинади.
