Турмуш ўртоғи билан Ҳинд океани бўйлаб сайёҳат қилган британиялик Кэтрин Ти уч ой олдин йўқолган Malaysia Airlines авиакомпаниясига тегишли лайнерни ёнаётган ҳолатда кўрганини айтмоқда, дея ёзади Daily Telegraph.
“Мен ёнаётган самолётга ўхшаган обьектни кўрдим. Мен эсимдан оғдим деб ўйладим. Самолёт ортидан эса қора тутун излари қолди”,-дейди 8 март куни Таиланд яқинида бўлган аёл.
Кэтрин Ти ушбу воқеани стресс ҳолатида бўлгани учун унга кўрингандек бўлиб, кўп вақт сақлаб юрди. Шундан сўнг К.Ти самолёт учган йўналиши тўғрисидаги маълумотни Малайзия ҳукуматига тақдим этди. Ушбу маълумотлар эса самолётнинг йўналиши билан тўғри келди.
Шунингдек, у ёнаётган лайнер атрофида яна икки самолёт парвоз қилгани ҳақида айтди.
“Ўша вақтда Boeing’дан юқори қарама-қарши йўналишда икки самолёт ҳаракат қилаётган эди. У икки самолётнинг навигацион чироқлари ёқиқ эди. Агарда биринчи самолёт ҳақиқатдан ҳам ёнаётган бўлса, бу икки самолёт бу ҳақда хабар беришади деб ўйладим”,-дея қайд қилиб ўтди аёл.
Май ойида Малайзиянинг йўқолган Boeing самолёти ҳарбийлар томонидан уриб туширилганлиги таҳмин қилинган эди.
Фантаст ёзувчи Найджел Коурсон ўзининг Рейс 370 ҳақидаги китобида АҚШ ва Таиланд ҳарбийлари ўқув машғулотлари давомида ушбу лайнерни уриб юборганликларини ёзди. Коурсоннинг айтишича, шу туфайли қидирув ишлари атайлаб нотўғри йўналиш томон ўзгартирилган.
Эслатиб ўтамиз, 24 март куни Малайзия бош вазири ва Malaysia Airlines авиакомпанияси самолёт ҳалокатга учрагани ва унинг бортидаги барча йўловчилар ва экипаж аъзолари ҳалок бўлганини маълум қилган эди.
Малайзия авиакомпаниясига қарашли бўлган самолёт 8 март куни парвозга чиққанидан икки соат ўтгач, сирли тарзда ғойиб бўлган. Лайнер бортида 227 нафар йўловчи ҳамда 12 экипаж аъзоси бўлган.
