Ўзбекистон Республикаси Президенти Шавкат Мирзиёев ташаббуси билан ўтказилаётган “Тинчлик жараёни, хавфсизлик соҳасида ҳамкорлик ва минтақавий шериклик” мавзуида Афғонистон бўйича юқори даражадаги Тошкент халқаро конференцияси бошланди. Бу ҳақда Ўзбекистон Миллий ахборот агентлиги маълум қилди.
Унда Ўзбекистон Республикаси Президенти Шавкат Мирзиёев, Афғонистон Ислом Республикаси Президенти Муҳаммад Ашраф Ғани, БМТнинг Афғонистондаги махсус вакили Тадамити Ямамото, Европа Иттифоқининг ташқи ишлар ва хавфсизлик сиёсати бўйича Олий вакили Федерика Могерини, шунингдек, АҚШ, Буюк Британия, Германия, Италия, Франция, Туркия, Россия, Хитой, Ҳиндистон, Эрон, Покистон, Қозоғистон, Қирғизистон, Тожикистон, Туркманистон, Саудия Арабистони ва Бирлашган Араб Амирликлари ташқи сиёсий маҳкамалари раҳбарлари, 25 давлат ва халқаро ташкилотлар вакиллари иштирок этмоқда.
Мазкур халқаро конференцияга дунё ҳамжамияти зўр қизиқиш билан қарамоқда. Жафокаш афғон халқининг умида катта.
Минтақада хавфсизликка эришиш, шу орқали нафақат Афғонистонда, балки Марказий Осиё ва унга туташ мамлакатларда тинч тараққиётни таъминлашга хизмат қилувчи мазкур конференцияда афғон муаммосини ҳал қилиш бўйича аниқ таклифлар илгари сурилиши кутилмоқда.
