Маъмурий-ҳудуий чегараларни белгилаш, ер ресурсларини хатловдан ўтказиш ҳамда яйлов ва пичанзорларда геоботаник тадқиқотларни ўтказиш тартибини янада такомиллаштириш чора-тадбирлари тўғрисидаги Ҳукумат қарори (ВМҚ–299, 23.04.2018 й.) қабул қилинди. Бу ҳақда Адлия вазирлигининг матбуот хизмати маълум қилди.
Қарор билан Ергеодезкадастр давлат қўмитасининг ердан фойдаланиш ва уни муҳофаза қилишни назорат қилиш бўйича давлат инспекторларига ташкилий-ҳуқуқий шаклидан қатъий назар, ердан фойдаланувчилар томонидан уларга ажратиб берилган ерлардан фойдаланиш ҳолатини мунтазам мониторинг қилиб бориш ҳуқуқи берилди.
Маъмурий-ҳудудий бирликлар чегараларини белгилаш тартиби тўғрисидаги низомга мувофиқ маъмурий-ҳудудий бирликлар чегараларини белгилаш қуйидаги ҳужжатлар мавжуд бўлмаганда амалга оширилади:
чегарани тасдиқловчи ҳужжат; чегараларни ёзувли матни; чегара чизиғи акс эттирилган картографик материаллар.
Ер ресурсларини хатловдан ўтказиш тартиби тўғрисидаги низомга асосан ер ресурсларини хатловдан ўтказиш ишлари ҳар 5 йилда бир марта ўтказилиб, Қорақалпоғистон Республикаси, вилоятлар ва Тошкент шаҳрининг ҳудудлари ҳар 5 йилда тўлиқ қамраб олинади.
Мулкчилик шаклидан қатъий назар, барча тоифадаги ерлар хатловдан ўтказилиши лозим.
Яйлов ва пичанзорларда геоботаник тадқиқот ишларини ўтказиш тартиби тўғрисида низомга мувофиқ геоботаник тадқиқот маълумотларидан қишлоқ хўжалигига мўлжалланган ер майдонларининг норматив қийматини аниқлаш, фармацевтика саноатида табиий шифобахш ўсимликлардан фойдаланиш, давлат кадастрлари ягона тизимини юритиш ички ер тузиш лойиҳаларини ишлаб чиқиш ҳамда ерлардан оқилона, самарали фойдаланишни ташкил қилишда фойдаланилади.
Яйлов ва пичанзорларнинг ўсимликлар билан қопланганлик даражасини аниқлаш бўйича геоботаник тадқиқотлар ер фондларининг қуйидаги тоифаларида ўтказилади:
қишлоқ хўжалигига мўлжалланган ерларда; ўрмон фонди ерларида; саноат, транспорт, мудофаа, алоқа ва бошқа мақсадларга мўлжалланган ерларда; заҳира ерларда; бошқа тоифадаги яйлов ерларда.
