Тошкент вилоятининг Оққўрғон тумани Хонобод маҳалласидаги аҳолини 8 йил давомида даҳшатли қўрқинч ва хавотир эгаллаб олган эди. Маҳаллада бирин-кетин вояга етмаган болалар бедарак йўқола бошлайди. Одамлар орасида “маньяк” пайдо бўлганлиги ҳақида ваҳимали гап сўзлар тарқалади.
Ҳаттоки, ўша йиллари бу воқеалар сабаб айрим оилалар маҳалладан бутунлай кўчиб кетади. Қидирувлар, суриштирувлар натижа бермас. Болалар эса гўёки туман каби ҳеч бир иссиз ғойиб бўлишарди.
Маҳалла аҳолиси билмасдики, норасида гўдаклар нола чекишга улгирмасиданоқ ваҳшийларча ўлдирилиб, маҳалладаги хонадонлардан бири Отабоевлар ҳовлисига, ахлатлар остига кўмиб ташланган эди. Бундай шавқатсиз жиноятларни шу жойда яшаб, ҳар куни қўни-қўшнилар билан салом-алик қилиб юрган Зоҳид Отабоев томонидан содир этилганлиги ҳеч кимнинг етти ухлаб тушига ҳам кирмаган эди.
Кўпчиликда жиноятга сабаб нима экан? Бундай ваҳшийликнинг тагида қандай сир-синоат бор экан деган савол туғилиши табиий. У ўч олиш мақсадида бу қотилликларга қўл урди.
Ҳуқуқ тартибот идоралари томонидан қидирув ва суриштирувлар олиб борилди. Бош прокуратуранинг ўта оғир жиноятларни тергов қилиш бошқармаси томонидан бу даҳшатли жиноят уч кунда фош этилди.
Уч нафар вояга етмаган болани ўлдирган Зоҳид Отабоев умрбод қамоқ жазосига маҳкум қилинди.
Жиноятнинг тўлиқ тафсилотларини Ўзбекистон Бош прокуратураси ҳузуридаги мультимедиа маркази томонидан тайёрланган лавҳада кўринг.
