Қайнсингилга суиқасд қилган келин жазога тортилди

ЖИНОЯТ 22.10.2018, 14:15
Қайнсингилга суиқасд қилган келин жазога тортилди

2018 йил 25 сентябрь куни жиноят ишлари бўйича Бойсун тумани суди очиқ сайёр суд мажлисида Сожида Мамажонова (мақоладаги исм – шарифлар ўзгартирилди)га оид жиноят иши кўриб чиқилди. Аёл ошхона пичоғи билан қайнсинглисига оғир тан жароµати етказган.

Сожида Мамажонова 1986 йилнинг 14 май санасида туғилган. Маълумоти ўрта. Оилали, 2 фарзанди бор. Уй бекаси. Муқаддам судланмаган.

Уч йиллик можаро

Қайнсингил ва келин можароси ҳеч кимга янгилик эмас. Ўзаро айбловлар, келишмовчиликлар, «у ундай деди, мен бундай дедим» қабилидаги машмашаларни тинч йўл билан ҳал қилиш мумкинлигини ҳам ҳаммамиз биламиз. Аммо Бу хонадонда оилавий келишмовчилик пичоқбозликкача бориб етди.

2018 йилнинг 9 август куни ошхонада овқат тайёрлаётган Сожида одатдагидек қайнсинглиси билан гап талашиб қолади. Келинойисига гап бермаётган Камола ўзини қанчалик ҳақ билса, Сожида ҳам у билан теппа–тенг олишарди. Аёлларнинг жанжали шу даражага етдики, Сожида ҳиссиётларига эрк берди, хатти–ҳаракатларини назорат қилолмай қолди. Ва ишлатиб тургани ош пичоқни қайнсинглисининг қорнига санчди. Бир неча сониялар ичида юз берган ушбу воқеа Сожидани шошириб қўйди. Ҳушсиз, қонга беланиб ётган қайнсинглисининг аҳқолидан қўрқиб кетиб, ҳовлига қараб чопди.

Бойсун тумани СТЭБнинг 2018 йил 17 августдаги 447-сонли экспертиза хулосасига кўра, К. Асророванинг қорин соҳасига санчилиб, кесилиб кирган жароҳат жигар ўнг бўлаги бешинчи сегмент санчилган кесилган жароҳати, қон кетишдан кейинги шок ўрта даражаси, чап ёноқ бўйин соҳасида тирналгантан жароҳатлари оғир жароҳат экани аниқланган.

Сожида айбига тўлиқ иқрор бўлган бўлса-да, асосий гапни айтмади: қайнисинглиси билан кўп йиллардан буён гаплашмаслигини яширди.

С. Мамажонова:

– Ўша куни ошхонада сабзи тўғраётгандим. Қайнсинглим – Камола кириб келгач, у билан бироз гаплашгандек бўлдик. Ўғлим эшик томон кета бошлаганида уни тўхтатмоқчи бўлиб, ортидан бордим. Шошганимдан қўлимда пичоқ борлигини унутибман. Ўғлимни ичкарига олиб кираётиб, «Сиз жиянингизга кўз – қулоқ бўлиб туринг, мен овқатга қарай», дея Камолага гапирдим. Ортимга ўгирилганимда эса у «вой» деб қорнини ушлаб қолди. Билсам, қўлимдаги пичоқ Камоланинг қорнига санчилиб кетган экан. Қайнсинглимнинг аҳволини кўриб, қаттиқ қўрқиб кетдим. Қўлимдаги пичоқни ерга ташлаб, ҳовлига чопдим. Бундай бўлишини хоҳламагандим. Менга ишонинг, қайнсинглимга нисбатан адоватим йўқ. Атай жонига қасд қилишни ўйламаганман. Бу бехосдан юз берди.

Сожида суддаги кўрсатмасида қайнсинглисининг бўйин соҳасида аниқланган жароҳатларга ҳеч қандай алоқаси йўқлигини айтган. Аммо Камола Асророванинг кўрсатмаси келинойисиникидан фарқ қилди.

Маълум бўлишича, Камола, мана, уч йилдирки, келинойиси билан гаплашмайди. Суиқасд юз берган кунга қадар ҳам иккиси кўп маротаба жанжаллашган.

К. Асророва:

– Июль ойларида келинойим акам билан тортишиб қолиб, уйдан чиқиб кетди. Ўша куни, яъни 9 августда келинойим ошхонада сабзи тўғраётган эди. Рости, уни кўриб аччиғим келди ва онамга: «Нима сабабдан у қайтиб келди? Бошқасига турмушга чиқмоқчи эди-ку», дедим. Келинойим «Нима қилишни сендан сўрамайман, ҳушимга келганини қиламан», деб мен билан айтишиб кетди. Сўнг ўнг қўлидаги ошхона пичоғини қорнимга санчиб олди. Жон ҳолатда «Мени пичоқлади, ёрдам беринглар», деб бақирдим. Бир зумда онам, қўни–қўшнилар етиб келишди. Қўшнимизнинг машинасида мени туман шифохонасига олиб кетишди.

Туман шошилинч тез тиббий ёрдам бўлимида К. Асроровага биринчи ёрдам кўрсатилиб, ҳаёти сақлаб қолинди. Сожида юз берган воқеадан қаттиқ пушаймонлиги, вояга етмаган фарзандлари борлигини айтиб, Камоладан кечирим сўради.

Қизини десинми ё келинини?..

Судда кўрсатма берган гувоҳ Ш. Мамажонова келини ва қизи ўртасидаги кўп йилликзиддиятни инкор этиб, «Уларнинг ўзаро келишмовчилигидан хабарим йўқ эди», деган.

Гувоҳ сифатида қатнашган Т. Асроров ҳам келини ва қизининг жанжалларидан бехабарлигини маълум қилган. Қизиқ, бир уйда яшаб келаётган одамлар, наҳот, қайнисингил ва келин ўртасидаги келишмовчиликдан хабарлари бўлмаса?! Ё атай яширишяптимикан?..

Гувоҳ Ш. Мамажонова:

— Ўша куни нон ёпаётгандим. Ошхонада Камола ва Сожиданинг оғзаки тортишиб қолишганини эшитдим ва дарҳол ўша ерга бордим. Ошхонага кирганимда иккиси бир–бирининг сочидан тортиб, жанжаллашишаётганди. Уларни ажратишга ҳаракат қилдим. Аммо уддалай олмадим. Шу пайт Камоланинг ўнг биқинидан қон оқаётганига кўзим тушди. Капалагим учиб «Қаеринг қонаяпти? Бу нима?», деб бақирдим. Қизим, биқинини ушлаб, «У мени пичоқлади», деди-ю, ерга йиқилди. Қўрқув аралаш тез ёрдамга қўнғироқ қилдим. Сўнг қизимни шошилинч тез ёрдам бўлимига олиб бордик.

Судда кўрсатма берган гувоҳлар: Ш. Мамажонова (қайнона), Т. Асроров (қайнота) ва Д. Мамажонов (судланувчининг эри) С. Мамажоновага енгиллик берилишини сўрашди.

Суд Сожида Мамажоновани ЖКнинг 104-моддаси, 1-қисмида назарда тутилган жиноятни содир этганликда айбли деб топди. Ва унга ЖКнинг 104-моддаси, 1 – қисми билан шу Кодекснинг 57-моддасини қўллаб, сутканинг соат 22:00 дан 06:00 гача яшаш жойидан чиқиши чекланган ҳолда бир йил муддатга озодликни чеклаш жазоси тайинланди.

Ўзбекистон Республикаси Олий суди матбуот хизмати ҳамда жиноят ишлари бўйича Бойсун тумани суди раиси Жасур Худойбердиев билан ҳамкорликда тайёрланди

Шарҳлар

Об-ҳаво: Тошкент
Валюта курси
1