Ҳар куни турли муаммолари билан таҳририят эшигини қоқувчилар кўп. Шундай мурожаатчилардан бирининг ўзи ҳақидаги фожиали ҳикояси барчамизнинг эътиборимизни тортди. 2017 йилнинг сентябрида аттракциондан отилиб тушган ва оқибатда қаттиқ жароҳат олган Баҳром Якубов юзлашган фожиа ҳақида дард ва алам билан сўзлаб берди...
"Болаликка қайтмоқчи эдим, оқибатда..."
— Бошимдан ўтганларини эслаб, гапириб бериш мен учун нақадар қийин бўлмасин уларни қайта хотирлашга аҳд қилдим. Ҳаммаси 2017 йил 16 сентябрда бошланди. Икки дўстим билан туғилиб ўсган Навоий шаҳридаги марказий маданият ва истироҳат боғига боргандик. “Айланма стул” аттракционларда учиш жараёнида мен ўтирган ўриндиқнинг носозлиги туфайли катта тезликда учаётган аттракциондан учиб чиқиб кетиб, зарба билан йиқилдим. Оқибатда ўраб турган панжара ёнида турган темир нарвонга бориб бурун ва кўз қисмим билан урилганман. Очиғи, ўша дақиқада ҳамма нарсани аниқ эслолмайман. Аммо одамларнинг ғала-ғовури, дўстларимнинг ваҳимаси ва шоша-пиша “тез ёрдам”га қўнғироқ қилиб, манзилни тушунтиришаётгани элас-элас ёдимда. Ўша куни “тез ёрдам”ни ҳам узоқ кутганимиз. Келган машина ҳам боғдан чиқиб кетиш йўлини тополмай роса вақтни олганди. Кейин ҳушимдан кетдим. Ўзимга келганимда атрофни зулмат қоплаганди...
Суд-тиббий экспертиза хулосаси
Воқеадан 18 кун ўтгач Навоий вилоят суд-тиббий экспертиза бюроси Баҳром Якубовнинг саломатлиги тўғрисидаги хулосани тақдим этди.
“Унинг танасида аниқланган жароҳатлар — қўшма шикастланиш, бош мия очиқ травмаси, бош мия лат ейиши, оғир даражаси. Энса суяги чизиқли синиши. Мия юмшоқ пардаси остига қон қуйилиши. Тепа соҳа мия ичи гематомаси ва иккиламчи ишемияси. Иккала ёноқ суяклари, юқориги жағ суяги, бурун суяги ва ғалвирсимон суяк, билак суякларининг очиқ синиши ва силжиши. Иккала кўз косалари суяклари синиши ва ўнг елка, сон пастки учлигидан ёпиқ синиши ва силжиши кузатилган.
Пешона, кўз қовоқлари, юз ёноқ соҳалари ва ўнг билак соҳалари эзилиб йиртилган жароҳати, танада кўплаб юмшоқ тўқималар қонталаши бор. Ушбу жароҳатлар белгиларига кўра ҳаёти учун хавфли бўлган оғир тан жароҳати қисмига тўғри келади”.
Ўзингиз ўйлаб кўринг, Баҳромнинг ана шундай даҳшатли жароҳатлардан сўнг жони омон қолгани, ота-онаси, турмуш ўртоғи ва мурғаккина қалби билан дадасига меҳр бериб турган ўғлининг бахти учун бу ёруғ оламда яшаётганининг ўзи бир мўъжиза эмасми?
"Бугун кўзларим ожиз..."
Ана шундан кейин ҳаётимда ҳақиқий маънода қоронғи кунларбошланди. 2017 йилнинг 20 сентябрида биринчи операция ўтди. Зарбанинг қаттиқлигидан йиқилганимда кўзим оқиб тушган экан. Сақлаб қолишнинг иложиси йўқ бўлгани учун ўнг кўзимни олиб ташлашган. Буни мен анча ўтиб билганман. Онам: “болам бир кўзи йўқлигини ўйлаб сиқилмасин”, деб бироз ўзимга келганимдан кейин айтгандилар.
Орадан бироз вақт ўтиб, иккинчи операция 9 октябрда ўтказилди. Юз қисмим операция бўлди. Юзим, кўз ва бурун суяклари майдаланиб кетган экан, махсус “темир”лар билан юзни “ясашди”. Кўзимга қайта нур бағишлаш илинжида жуда кўп шифокорларга мурожаат қилдик. Фойдаси бўлмади. Кейин устозим (таҳририят номидан: Баҳром Якубов санъатга илк қадамларини ташлашга улгурган “Қувноқлар ва Зукколар” жамоасида қатнашиб, бир неча хонандаларнинг клипларида ҳам суратга тушган) Жаҳонгир Позилжоновнинг маслаҳати билан хусусий клиникалардан бирида Ҳиндистондан келиб ишлайдиган шифокорнинг назорати менга умид бағишлади. У мендаги оғир аҳволни фақат Ҳиндистондаги керакли мосламалар билан бартараф этиш мумкинлигини айтди.
Очиғи, молиявий аҳволимиз ҳам жуда оғир, соғлигимни тиклаш учун катта маблағ сарфлагандик. Шу кунгача 4 та жарроҳлик амалиётини бошдан ўтказиб, соғлигимни бугунги ҳолатга келтиргунча 200 млн. сўмдан зиёд пул сарфладик. (Ҳатто ҳамюртларимизга карта рақамини ташлаб, хайрия қилишларини сўрагандик. Барака топишсин, саховатлилар кўп экан) Ўзингизга маълум, хориждаги тиббиёт хизматлари ҳам арзон эмас. Бунда ҳам устозим қўллаб-қувватлади. Харажатларимнинг бироз қисмини Жаҳонгир ака тўлаган. Ҳиндистонда шифокор чап кўзимнинг тўр пардасини жойига қўйишган ва йиғилган, қотган қонни олиб ташлашга муваффақ бўлган. Кейин махсус суюқлик қуйилди (Шу фурсатдан фойдаланиб, барча яқинларим, Жаҳонгир Позилжоновга қилган яхшиликлари учун мингдан-минг раҳмат айтаман).
Бугун яна бир жарроҳлиқ ишини амалга ошириш учун тайёргарлик кўряпман. Мутахассисларнинг айтишича, чап кўзимнинг орт томонидаги жароҳатларни бартараф этиш керак. Бу амалиёт фақат Россиянинг Уфа шаҳрида қилинаркан. Юзнинг суяк қисмига қўйилган темирларни ҳам олиб ташлаш, бурун қисмини ҳам тўғирлаш лозим. Шифокорларнинг айтишича, наркозни ҳам кўп қабул қилишим мумкин эмас экан. Организм кўтара олмаслиги мумкин, дейишяпти. Шунинг учун насиб қилса, Уфага борганда юзимга қўйилган темирларни олдириб, бурун қисмини тўғрилаб, ўнг кўзимга ҳам протез қўйдираман. Аммо очиғи қўлим калта. Вазият қандай чиқишни жарроҳлик иши учун талаб қилинаётган катта суммани қаердан топишни билмай, бошим қотган.
Биласизми, ҳаётимда содир бўлган бу воқеани эшитган ҳар бир инсон масаланинг иккинчи томонига қизиқади. Яъни боғ маъмурияти қандай ёрдам берди? ҲЕЧ ҚАНДАЙ! Гўёки, менинг бугунги аҳволимнингуларга алоқаси йўқдай муносабатда бўлишяпти. Ҳатто, бугунгача давом этаётган муолажаларимда бирор маротаба ҳолимдан хабар ҳам олишгани йўқ.
Баҳром қўлимизга Навоий шаҳар ички ишлар бўлими ҳузуридагитергов бўлимининг тўплаган ҳужжатларини тутқазди. Уларни кўздан кечирдик. Қоғозлардаги тафсилотлар сизларни ҳам бефарқ қолдирмас, деган умидда уларнитақдим этамиз.
"Воқеа жойини кўздан кечирамиз..."
Тақдим этилган ҳужжатлар орасида мазкур иш бўйича Навоий вилояти ИИБ мутахассислари ва Навоий вилояти Меҳнатни муҳофаза қилиш ва меҳнат шароитлари экспертизаси Давлат инспекцияси воқеа жойини кўздан кечириш баённомасида келтирилишича, “Айланма стул” кўнгилочар аттракционнинг олтинчи сариқ рангдаги ўриндиқ бузилгани ва ҳимоя воситаси хавфсизлик камарлари мавжуд эмаслиги ёзилган. Аттракционни ўраб турган яшил панжара ёнида эса темир нарвон борлиги ҳам фотоларда қайд этилган. Хулосага кўра, “Айланма стул” яъни “Панда” ўриндиқлар таъмирталаблиги аниқланган.
"Техник ҳолат ҳақида иккиламчи хулоса"
“Саноатгеотехназорат” текширувида 2017 йил 22 сентябрда олиб борилган текширув ишларида фақат ўриндиқларнинг айримларида бўёқ кўчгани айтилган бўлса, “Эко-иссиқликсозлаш” хулосасида аттракцион техник хавфсизлик ҳолати бўйича камчилик топилмаганлиги баён этилган. Хўш, ундай бўлса, юқорида Навоий шаҳар Ички ишлар бошқармаси Тергов бошқармаси олиб борган тергов олди текширувидаги “Айланма стул” кўнгилочар аттракционнинг олтинчи сариқ рангли ўриндиқда ҳимоя воситаси хавфсизлик камарлари мавжуд эмас”, деган фикрлар қаёқда қолди?
Бўлган вазиятни иккинчи томон қандай изоҳлайди. Истироҳат боғининг раҳбари Жумамурод Каримовга мурожаат этдик.
"Ҳақиқат юзага чиқишига ишонгим келяпти"
Очиғи боғ маъмурияти барчасида ўзимни айблашаётганидан “шок”даман. Нима эмиш, мен селфи олиш учун ўрнимдан турган эканман. Ўзингиз ўйланг, айланиб турган аттракционнинг ўриндиғидан қандай туриш мумкин. Оёқ томонда тиралиб чиқадиган нарса ҳам йўқ бўлса, бу ишни қандай амалга оширишим мумкин эди? Бундай хавфли ҳаракат қандай оқибатга олиб келишини билсам керак! Бундан ташқари, телефоним пулларим билан бирга чўнтагимда бўлган. Телефоним ҳатто қаттиқ шикастланмаган ҳам. Текширув жараёнида эса ундан ҳеч қандай фото ё видео ҳам топишмади. Аттракционнинг мен ўтирган ўриндиғи сингани оқибатида мен бир неча сония, хавфсизлик камарда осилиб туриб, вазнимни кўтаролмаганимдан пастга йиқилганман. Ёнимда бўлган дўстларим узилиб кетган камарни ҳам кўришганди. Аммо кейинчалик текширувларда камар йўқолиб қолгани аниқланди...
Хуллас, ақлга сиғмайдиган баҳоналар билан парк маъмурияти ўзини жавобгарликдан олиб қочмоқда. Бундай муносабат ва бефарқликка чидолмайман. Боғ маъмурияти устидан шикоят қилиб тегишли жойларга ариза ёзишга мажбур бўлдим. Аммо ҳеч қандай ижобий жавоб йўқ. Улардаги хулосаларда ҳам фақат мени айблашган. Нима қилишга бошим қотган. Аммо ҳақиқат юзага чиқишига ишонгим келяпти.
Суҳбат давомида қаҳрамонимиз бугун I гуруҳ ногирони бўлса ҳам жуда кўп ташкилотларнинг эшигини қоққанига гувоҳ бўлдик. Ҳамма жим ва бир йил аввалги фожиани гўё ҳамма унутгандек. Бироқ қаҳрамонимизни ёлғиз ташлаб қўйишга бизнинг виждонимиз йўл қўймади. Унга ёрдам қўлини чўздик ва ташкилотлар билан ўзимиз боғланиб кўришга қарор қилдик...
Бош прокуратура изоҳи
Ўзбекистон Республикаси Бош прокуратурасига йўллаган мурожаатимизга қуйидагича изоҳ берди. Текшириш натижасига кўра, ушбу ҳолатда истироҳат боғи маъмурияти ва бошқаларнинг ҳаракатларида бирор-бир жиноят аломатлари аниқланмаганлиги сабабли, жорий йилнинг 5 март куни ЖПКнинг 83-моддаси 2-бандига асосан жиноят иши қўзғатилишини рад қилиш ҳақидаги қарор қабул қилинган.
Вазият ўзгармади...
Кўриб турганингиздек орадан бир йил вақт ўтса ҳамки, ҳали ўша-ўша “анъанавий” жавоблардан нарига ўтилмаяпти. Наҳот, вазиятни кўра-била туриб, шундай бефарқлик билан қараш мумкин бўлса? Тўғри, эҳтимол, Баҳромнинг ўзи эҳтиётсизликка йўл қўйгандир, аммо нима бўлганда ҳам ҳеч бир омил инсон қадридан юқори бўлолмайди!
Қуйида эса жабрланувчининг адвокати Бойназар Хайдаров тақдим этган маълумотномани ҳавола этамиз.
Алия СУЛАЙМАНОВА тайёрлади
