Вақтнинг тез ўтишини қаранг! Яқиндагина Ўзбекистон миллий терма жамоаси Бразилияда ўтадиган Жаҳон чемпионати саралашида муваффаққиятли иштирок этаётганини биргаликда кузатаётгандик. У кунлар ҳам ўтди...
Кейин кутилмаганда, термамиз мундиал имконини йўққа чиқарди. Қалбимизда бир оғриқ билан ўша кунларни ҳам ўтказдик. Футболдан ёки термамиздан "совиб" кетмадик. Аксинча, янада жипслашиб, термамиз атрофини кузата бошладик, керак бўлса, танқид қилдик. Қандайдир, янгиликлар бўлишига умид қилдик. Қиляпмиз, ишоняпмиз...
Мана бугун эса, ноябрь ойининг 11-санасига етиб келибмиз.
Яна роса 60 кундан кейин Австралия қитъасида Осиё кубоги-2015 мусобақаси старт олади. Тўғри, ушбу мусобақага худди тўрт йил бурун Қатардаги каби қарашимиз ҳам мумкин эди. Унга оддий мусобақалар сингари эътибор қаратишимиз ҳам мумкин эди. Йўқ, ундай қила олмаймиз. Буниси барибир бошқача. Гўёки, мундиалдан қолиб кетганимиз алами ювилади ёки футболимиз ривожи шу Кубокка қараб қолгандек туюлаверади.
Негадир, кўпчилик январь ойида Миржалол Қосимов шогирдларидан камида финалга чиқишни кутмоқда. Бошқаси, яраларга малҳам бўлмайди, гўё.
Агар гуруҳимиздан чиқа олсак, плей-оффда бизни "А" гуруҳи етакчилари (агар гуруҳдан чиқишса) Автралия ёки Жанубий Корея термалари кутиб турган бўлади. ЖЧ-2014 саралаши ва Қатар-2011 ярим финал аламини олиш имкони бўлади, шунда. Лекин, унгача биз гуруҳда чиқишимиз керак. Барча рақибларимизни ортда қолдиришимиз керак. Бу масаланинг биринчи жиҳати.
Иккинчи жиҳати бўлса, бу термамиз ҳозир олтин авлодга эга. Ҳа, ким нима деса десин, Ўзбекистон термаси яқин 15 йил ичидаги энг кучли таркибга эга. Улардан бемалол ғолибликни кутишга ҳаққимиз бор.кейинги кучли терма шаккланиши учун яна камида 3-5 йил керак бўлади. Буни кўряпмиз...
Умид қиламиз, футболчиларимиз ҳаммамизнинг ишончимизни оқлашади.
Манба: www.uff.uz
