Мамлакатимизнинг собиқ биринчи рақамли теннисчиси Оқгул Омонмуродова Россиянинг Санкт-Петербург шаҳрида старт олган турнирдаги иштирокини ғалаба билан бошлади. Ҳамюртимиз соврин жамғармаси 50 минг АҚШ долларидан иборат бўлган Ladies Neva Cup 2015 мусобақасининг илк даврасида мезбон теннисчи Майя Кацитадзени 6:4, 6:2 ҳисобида таслим этди, деб ёзади olamsport.com нашри.
Россиялик бу теннисчи турнирга имтиёзли йўлланма асосида қўйилган эди. Бугун Омонмуродова иккинчи даврада турнирнинг еттинчи ракеткаси беларуслик Ольга Говорцовани мусобақадан чиқариб юборган латвиялик Елена Остапенко билан ҳисоб-китоб қилади. Остапенконинг асосий тўрга саралаш орқали етиб келганлиги эътиборга молик.
