Пойтахтимизда теннис бўйича ўсмирлар ўртасидаги халқаро турнирнинг асосий тўр баҳслари бошланди.
Tashkent ITF Juniors турнирида мамлакатимизнинг истеъдодли теннисчиларидан ташқари Россия, Ҳиндистон, Бельгия, Туркия, Украина, Қозоғистон, Буюк Британия, Польша, АҚШ, Беларусь каби давлатлардан ҳам ёш ракетка усталари ғолиблик учун кортга чиқишяпти. 18 ёшгача бўлган теннисчилар иштирокида ўтаётган мусобақанинг биринчи ракеткаси сифатида ҳамюртимиз Жўрабек Каримов қайд этилган бўлиб, кеча у илк даврада россиялик Никита Валенцевни 6:1, 6:2 ҳисобида таслим этди. Ҳумоюн Султонов турнирнинг бешинчи ракеткаси россиялик Лев Казаковдан 6:3, 6:0 ҳисобида устун келди.
Шунингдек, яна икки теннисчимиз ўз учрашувларини ғалаба билан якунлашди. Шаробиддин Абзалов америкалик Дамина Айени 7:6(5), 7:5, Саидаъло Саидкаримов эса россиялик Николай Колабаевни 3:6, 6:0, 6:2 ҳисобида енгди.
Қорақалпоғистонлик Сунатилла Қуттибоев мусобақанинг учинчи ракеткаси британиялик Алексис Кантерга икки сетда ҳам бир хил 4:6 ҳисобида имкониятни бой берди. Азизхон Турғунов эса беларуслик Микалай Халякка 2:6, 6:2, 1:6 ҳисобида ютқазиб қўйди.
Манба: olamsport.com
