Селин Дионни танимайдиган инсон бўлмаса керак. Машхур “Титаник” фильмига куйланган саундтреки орқали миллионлаб инсонларнинг қалбидан жой олган латофатли, гўзал хонанда бугун, 30 март куни ўзининг 47 ёшлигини қарши олмоқда.
Хонанданинг асл исми Селин Мари Клодетт Дион. У 1968 йили Шарлемань шаҳри, Квебек провинциясида, кўп фарзандли оилада дунёга келган.
Оиладаги 14 фарзанднинг энг кичиги бўлган Селин болалигидан мусиқага қизарди. Хусусан, унинг оила аъзолари ҳам мусиқани севишарди.1973 йилнинг 3 август санасида у илк бор, ота-онасининг кичкинагина “Le Vieux Baril” номли бари саҳнада акаси Мишельнинг тўйида машхур қўшиқчи Кристина Шарбоннонинг “Du fil des aiguilles et du coton” қўшиғини куйлаган. Албатта, Селин ҳам бошқалар каби болаликдан қўшиқчи бўлишни, уни бутун дунё олқишлашини орзу қилган. Аммо бир кун келиб бунга эриша олишига у қадар ишонмаган. 1994 йили People журналига берган интервьюсида у шундай дейди:
“Мен ота-онам, яқинларим, уйимни соғинардим. Аммо шундай бўлса-да, мен ўз вақтимни, ёшлигимни беҳуда сарфламадим, деб ҳисоблайман. Чунки менинг ягона орзуим хонанда бўлиш эди...”
12 ёшга кирганида у онаси ва акаси Жак билан биргаликда “Ce n’était qu’un rêve” – “Бу фақатгина туш эди” қўшиғини яратади. Яна бир акаси Мишель эса ушбу қўшиқ ёзилган тасмани Рене Анжелилнинг мусиқий менежерига юборади. Қўшиқни эшитиб кўрган Анжелилнинг кўзларига ёш келади ва у Селинни юлдуз даражасига олиб чиқишга қарор қилади.
1981 йили Анжелил ўз уйини сотувга қўяди ва маблағни Селиннинг илк “La voix du bon Dieu” номли қўшиғини ёзиш учун сарфлайди. Бу қўшиқ Селинни Квакабедаги юлдузга айлантиради. Тез орада уни Квакабелик Дион деб чақира бошлашади.
Селиннинг истеъдоди унинг 1982 йилда Токиодаги Yamaha фестивалидаги иштирокидан сўнг барчани ҳайратга солади ва у дунё бўйлаб барчанинг эътиборига туша бошлайди. Ушбу фестивалда бўлажак хонанда “Энг яхши қўшиқчи” мукофотини қўлга киритади ва “Энг яхши қўшиқ учун” номинациясида ғолиб сифатида “Tellement j’ai d’amour pour toi” медалига сазовор бўлади.
1983 йил Селин Дион учун жуда омадли келади. У Канадада олтин пластинкани қўлга киритган биринчи хонанда бўлади. Олтин пластинка Селинга “D’amour ou d’amitiе” қўшиғи учун берилган. Шу билан бирга айнан мана шу йилда у бир қанча “Феликс”, “Энг яхши аёл қўшиқчи”, “Йил топилмаси” каби мукофотларга ҳам сазовор бўлади.
1988 йили Дион Дублинда “Евровидение 1988” конкурсида Швейцария номини ҳимоя қилган ҳолда “Ne partez pas sans moi” қўшиғи билан иштирок этади ва ғолибликни қўлга киритади. Бу вақтгача Селин Дион фақат француз тилида қўшиқ куйлаган. 18 ёшида Майкл Жексон ижросидаги қўшиқни эшитар экан, у Анжелилга Майкл Жексонга ўхшаган хонанда бўлишни исташини айтади. Ундан бу гапни эшитган Анжелил Селиннинг истеъдодини ривожлантириш учун унга бошқа тилда, хусусан инглиз тилидаги қўшиқларни яратишига ва уни бутун дунёга танитиш лозимлигини тушунади.
Бироқ, орадан бироз вақт ўтмай, Селин Дион саҳнадан “йўқолиб” қолади. Аслида у ташқи кўринишини яхшилаш учун стоматологик жарроҳлик амалиётини бошдан ўтказаётган эди. Шу билан бирга у 1989 йили Берлиц мактабига, инглиз тилида яхши сўзлай олишни ўрганиш учун ўқишга киради.
Кутилмаганда 1989 йили Incognito альбомига бағишланган тур вақтида Селин Дион овозини йўқотади. Машхур оториноларинголог Уильям Гулд унинг олдида икки йўл борлигини айтгач, Селин дахшатга тушади. У таклиф қилган йўлнинг биринчиси, овоз пайчаларида жарроҳлик амалиётини ўтказиш, иккинчиси эса 3 ҳафта давомида умаман қўшиқ айтмаслик эди. Бироқ айнан ўша вақтда Селин бир қатор танловлар ва тадбирларда иштирок этиши керак эди. Узоқ ўйлагач, Селин Дион 3 йил давомида умамн қўшиқ айтмаслик йўлини танлайди ва Уильяма Райлининг қўлида овозини яхшилаш бўйича дарс олади. Чунки унга қўйилган ташхиснинг сабаби, овозни нотўғри йўналтириш, ишлатиш эди.
1990 йили инглиз тилини тўлиқ ўргангач, Селин Дион Unison альбоми билан оммага кўрина бошлайди.
1991 йили у АҚШ ҳарбийларига атаб куйланган қўшиғи учун қатор номинацияларда ғолибликни қўлга киритади. "Соҳибжамол ва маҳлуқ" мультфильми учун с Пибо Брайсоно билан куйланган дуэт эса уни бутун дунёга машхур қилади. Бу қўшиқ учун у “Оскар”, “Грэмми” мукофотларини қўлга киритган. Ушбу катта ғалабадан сўнг "Соҳибжамол ва маҳлуқ" қўшиғини у 1992 йилги альбомидаги қўшиқлари сирасига киритади.
1992 йили хонанда Шимолий Америка юлдузи деб тан олинади. У ҳам француз ҳам инглиз тилида қўшиқ айта оладиган хонандалар сирасига кирди. Бироқ АҚШда омад ва машхурлик қуршовида қолган йилларида унинг француз мухлислари унга қарши фикрларни айта бошлашади ва у чексиз танқидлар остида қолиб кетади. Бу ҳолат “Инглиз тилида қўшиқ куйловчи хонанда” номинациясидаги “Феликс” мукофотини қўлга киритиш чоғида айниқса, авж олади. Бир неча кун ўтиб, Селин Дион расман ана шу мукофотдан воз кечишини билдиради. Шундай қилиш баробарида у француз экани ва инглиз тилида қўшиқ куйлагани билан у инглиз эмас, француз хонандаси эканини ҳам айтади.
Ижодий фаолиятдагидек каби, Селиннинг шахсий ҳаётида ҳам ўзгаришлар юз бера бошлайди. 26 ёш катта бўлган Рене Анжелил унинг севган инсонига айланади. Бироқ у буни оммадан сир сақлайди.
1993 йили ниҳоят уларнинг муносабатлари оммага ошкор бўлади. Селин Ренени “менинг муҳаббат гулим” деб атаган ҳолда инглиз тилидаги The Colour of My Love альбомини севган кишисига бағишлайди. Очиғини айтганда, у муҳаббатини мухлисларининг танқидига учрамаслик учун яширганди,бироқ муносабатлар ошкор бўлгач, барча уларнинг ўртасидаги муҳаббатни илиқ қарши олди.
1994 йилнинг декабрида улар турмуш қуришди. Турмуш қургач, бир неча йил ўтиб, Селин фарзанд кўриш орзуси билан яшай бошлайди. Бироқ шундай вақтда унинг турмуш ўртоғи Ренега Томоқ саратони ташхиси қўйилади. Севимли инсонининг саломатлиги учун Селин Дион икки йилга саҳнани тарк этади ва уни ўзи парвариш қилади. Шифокорлар томонидан ўтказилган мураккаб жарроҳлик амалиётидан сўнг эса Рене ва Селинга улар табиий равишда фарзанд кўра олмасликлари ҳақида айтишади. Бироқ Селин жарроҳлик амалиётидан аввал музлатиб қўйилган эмбрионлардан фойдаланишга аҳд қилади ва натижада 2001 йили у ўғли Рене-Шарльни дунёга келтиради.
Гарчи, керакли муолажалар жарроҳлик амалиётидан олдин қилиниб, тухум хужайралар Рененинг саратонга чалиниб бўлган вақтида олинган бўлса-да, фарзанд мутлақо саломат туғилади. Бу вақтга келиб, Рене ҳам тузалиб, оёққа туради.
2000 йилнинг май ойида Селин Дион Нью-Йоркдаги клиникаларнинг бирида экстрокорпарал уруғлантириш орқали ҳомиладор бўлиш учун икки маротаба кичик жарроҳлик амалиётини бошдан ўтказишга рози бўлади. 2010 йили ниҳоят у ҳомиладор бўлади ва 23 октябр санасида бир йўла эгизак фарзандларини кечарча кесиш йўли орқали дунёга келтиради. Уларга Эдди ва Нельсон деб исм берилади.
Шунинг билан кейинги барча йилларда Селин Дион француз ва инглиз тилларидаги қатор альбомларни ёзди.
1997 йили у режиссёр Жеймс Камерондан “Титаник” фильми учун саундтрек куйлаш таклифини олади. “My Heart Will Go On” деб номланувчи ушбу қўшиқ уни “Оскар” ва учта “Грэмми” мукофотига сазовор қилади.
Селин Дион дунёга машхур кўплаб хонандалар, хусусан Барбара Стрейзанд, Bee Gees, Кэрол Кинг, Брайан Адамс, Андреа Бочелли, Лучиано Паваротти, Анастэйша, Жан-Жак Голдман, Ричард Маркс, Энни Мюрей, Шер, Ар Кэлли каби ўнлаб машхурлар билан дуэт қўшиқларни куйлаган.
2010 йили у БМТнинг кўнгилли элчиси этиб тайинланади.
Ўтган йилнинг август ойида Селин турмуш ўртоғининг саломатлиги туфайли яна танаффус олишини айтади. Яқин кунларда у яна саҳнага қатиш арафасида.
