Мамлакатимиз мустақиллигининг 24 йиллиги арафасида – 22 август куни юқори тезликда ҳаракатланувчи “Afrosiyob” электропоезди Тошкент – Қарши йўналишида илк қатновни амалга оширди.
Бундан тўрт йил аввал мамлакатимиз пойтахти билан Самарқанд шаҳри ўртасида Испаниянинг “PATENTES TALGO S.L.” компаниясида ишлаб чиқарилган, юқори тезликда ҳаракатланувчи “Afrosiyob” электропоезди қатновининг йўлга қўйилгани бу соҳада амалга оширилган улкан ишларнинг амалдаги ифодаси бўлди, дея хабар беради ЎзА.
Икки локомотив, саккиз йўловчи вагони ва вагон-ресторандан иборат ушбу замонавий поезд ўтган даврда халқимиз ва юртимиз меҳмонларининг энг қулай ҳамда ишончли транспорт воситасига айланди. Буни қатнов йўлга қўйилгандан бери мазкур поездда 600 мингдан зиёд йўловчи манзилига етказилганида ҳам кўриш мумкин.
“Afrosiyob” электропоездининг Тошкент-Самарқанд-Қарши йўналишида доимий ҳаракатланишини таъминлаш мақсадида “Ўзбекистон темир йўллари” акциядорлик жамияти мутахассислари томонидан улкан қурилиш ва бунёдкорлик ишлари амалга оширилди.
Давлатимиз раҳбарининг 2010 йил 21 декабрдаги “2011-2015 йилларда инфратузилмани, транспорт ва коммуникация қурилишини ривожлантиришни жадаллаштириш тўғрисида”ги ҳамда 2012 йил 5 январдаги “Мароқанд-Қарши темир йўл участкасини электрлаштириш” лойиҳасини амалга ошириш чора-тадбирлари тўғрисида”ги қарорларига асосан 140,8 километрлик Мароқанд-Қарши участкаси тўлиқ электрлаштирилди. 11 станцияда 9 километр пўлат излар реабилитация қилинди, 2100 куб/метрдан ортиқ тупроқ ишлари бажарилди.
Поездларнинг ишончли ҳаракатланиши, алоқа тизимларининг нуқсонсиз ишлашини таъминлаш мақсадида замонавий автоматлаштирилган диспетчерлик бошқаруви, электр энергия сарфини автоматик ҳисоб-китоб қилиш тизими йўлга қўйилди. Участканинг барча кесишмалари радиоалоқа ва телефон алоқаси билан жиҳозланди, йўлларнинг икки томонига темир панжаралар ўрнатилди.
Шу кунгача йўловчи поездлари Тошкентдан Қаршигача бўлган 511 километр масофага қарийб олти соатда етиб борган бўлса, “Afrosiyob” электропоезди ушбу йўлни уч соатда босиб ўтади.
