Жиноят ишлари бўйича Андижон вилоят суди тамагирлик билан шуғулланиб келган АТБ "Қишлоқ қурилиш банк" хамда ДТ "Халк банки"нинг вилоятдаги раҳбарларини узоқ муддатга озодликдан маҳрум этди.
Суд АТБ "Қишлоқ; қурилиш банк" Андижон минтақавий филиали бошқарувчиси вазифасида ишлаб келган Ҳ..Аҳмадалиев ва ДТ "Халқ банки" вилоят филиали етакчиси Р.Сайдалиевларни кредит олиш учун мурожаат этган "Субҳидам ғунчаси" МЧЖ раҳбаридан тамагирлик йўли билан катта миқдорда пора олганликда айбдор деб топди.
"Субхидам гунчаси" МЧЖ 2008 йилдан буен аҳолига тиббий ва маиший хизмат курсатиш билан шугулланиб келган. Тадбиркорлик фаолиятини янада кенгайтиришни мўлжаллаган жамият раиси 950 млн. сум микдорида кредит ажратиб беришни сўраб, "Қишлоқ қурилиш банк» Андижон минтақавий филиалига мурожаат қилади. Банк бошқарувчиси Х.Аҳмадалиев эса 5 минг АҚШ доллари эвазига тадбиркор талабини ижобий ҳал қилишга розилик беради. МЧЖга ажратилган кредитни молиялаштириш давомида банк бошқарувчиси мижоздан яна 70 млн. сўм талаб қилади. Тадбиркор бошлаб қўйган ишларини давом эттириш учун бу таклифга ҳам рози бўлади ва талаб қилинган пулнинг ярмини бўлиб-бўлиб беради.
ДТ «Халқ банки» Андижон вилоят филиалига 2 млрд сўм молиявий кўмак сўраб мурожаат қилган тадбиркор-шифокор бу ерда ҳам тамагир раҳбарга дуч келади. Мансаб ваколатини суиистеъмол қилган банк бошкарувчиси Р.Сайдалиев мижоздан дастлаб 3 минг АҚШ доллари, кредит пулларини расмийлаштириш давомида яна 22 минг АҚШ долларини "хизмат ҳақи" сифатида санаб олади. Ажратилган кредитларни олгунга қадар тадбиркор банкнинг амалиёт бўлими бошлиғи Ш.Мадалимовга 2 минг, "Куйганёр" бўлими бошлиғи Ш.Рустамовга эса 2300 АҚШ доллари беришга мажбур булади.
Суд ҳукми билан тамагир банкирлар 6 йилдан 10 йилгача булган муддатга озодликдан маҳрум этилди.
