Ijtimoiy tarmoqlarda аndijonlik yosh kelinchakni noma`lum ayol kaltaklagani haqidagi video tarqaldi. Aytilishicha, videoda aks etgan voqea Andijon viloyati Buloqboshi tumanida ro`y bergan. Bu ayol eri xiyonat qilganidan xabar topib, uni tuman markazidagi ko`p qavatli uyga izlab borgan, u erda esa ijara uyda fohishaxona tashkil qilgan ayoldan kaltak egan.
Andijon viloyat ichki ishlar boshqarmasi voqea aslida boshqacha bo`lganini ma`lum qilmoqda.
Ma`lum bo`lishicha, videotasvirdagi voqea 2020 yilning 1 avgust kuni soat 11:20 da Buloqboshi tumani «Mirzakalon Ismoiliy» mahallasida sodir bo`lgan.
Viloyat IIBning yozishicha, tergovga qadar tekshiruv ishlari davomida Buloqboshi tumani «Sohibkor» mahallasida yashovchi fuqaro D.M. turmush o`rtog`i Sh.M. bilan "Tico" avtomashinasida oyog`ini shifokorga bog`latish maqsadida manziliga borganida shu ko`chada yashovchi voyaga etmagan fuqaro M.X. uning mashinasiga turtilib ketgan.
Bundan jahli chiqqan haydovchi bolani uyatli so`zlar bilan haqoratlagan. Oradan biroz vaqt o`tgandan keyin boladan kechirim so`rash maqsadida uning yashash uyiga borgan. Shunda bolaning onasi M.G`. haydovchi va uning turmush o`rtog`ini uyatli so`zlar bilan haqoratlab, urgan.
«Bo`lib o`tgan holatdan so`ng ayol shu kunning o`zida haydovchi va uning turmush o`rtog`idan kechirim so`ragan. Ushbu holat yuzasidan 2020 yilning 9 avgustiga qadar Buloqboshi tumani ichki ishlar bo`limiga hech qanday ariza va shikoyatlar kelib tushmagan», — deyiladi viloyat IIB tarqatgan xabarda.
Qo`shimcha qilinishicha, Buloqboshi IIB xodimlari tomonidan olib borilgan dastlabki surishtiruv ishlarida ushbu videotasvir tumanning «Mirzakalon Ismoiliy» mahallasida yashovchi fuqaro N.E. tomonidan internetga joylanib, noto`g`ri izohlangani ma`lum bo`lgan.
Hozirda mazkur holat yuzasidan surishtiruv harakatlari olib borilmoqda.
