Britaniya Bosh Vaziri Boris Jonsonning aytishicha, mamlakatdagi maktablarni sentyabrdan boshlab ochish ijtimoiy, iqtisodiy va axloqiy zaruriyat hisoblanadi. Jonson davom etayotgan koronavirus pandemiyasiga qaramay hukumat maktablarda o`quvchilar salomatligini saqlay olishini ta`kidlagan. Bu haqda tarjumon.uz xabar berdi.
Shu oyning boshida olib borilgan o`rganishlar natijasiga ko`ra, agar koronavirus va uning zanjirini aniqlash bo`yicha tizim yaratilmasdan maktablar ochilsa, qish fasliga kelib Britaniyada COVID-19 ning ikkinchi to`lqini yuzaga kelish xavfi tug`iladi. Ikkinchi to`lqinda koronavirus birinchisidan ikki baravar ko`p tarqalishi mumkin.
Lekin, Jonson maktablarni ochishni mamlakatdagi eng muhim ish deb hisoblamoqda. U agar kelajakda karantin joriy qilinsa, yopiladigan eng oxirgi muassasa maktablar bo`lishini ham ta`kidlagan.
Britaniyada maktablar mart oyida yopilgan va iyun oyida oz sonli o`quvchilar bilan qayta ochilgandi. Britaniya hukumati ham sentyabrning boshidan barcha o`quvchilar maktabga qaytishlarini xohlamqoda.
“Maktablarimizni kerakli bo`lgan muddatdan bir lahza ko`proq yopib qo`yishimiz ijtimoiy, iqtisodiy va axloqiy jihatdan katta zararni keltirib chiqaradi. Pandemiya tugagani yo`q. Lekin, endilikda biz barcha o`quvchilarning sog`ligini saqlagan holda maktablarni ochish bo`yicha etarlicha bilimga egamiz” deydi Boris Jonson.
