Xalqimizning sevimli aktyori, Otabek rolini mahorat bilan ijro qilgan buyuk san`atkor, O`zbekiston xalq artisti O`lmas Alixo`jaev porloq xotirasi uchun "O`zbekkino" Milliy agentligi rahnamoligida poytaxtdagi “Minor” qabristoniga yodgorlik qabrtoshi o`rnatildi.
O`lmas Alixo`jaevni ishonch bilan milliy kinematografiyamizning ramzi, deya atash mumkin. Etuk san`atkor ilk bor 1963 yil "Farg`onalik beshovlon" filmida rol ijro etgan. 1964 yildan "O`zbekfilm" kinostudiyasida faoliyat yuritib, ushbu studiyaning qirqdan ortiq badiiy va televizion filmlarida suratga tushgan.
Aktyor O`lmas Alixo`jaevga rejissyor Yo`ldosh A`zamov tomonidan suratga olingan "O`tkan kunlar" (1969) tarixiy filmidagi Otabek roli (Abdulla Qodiriyning shu nomdagi romani asosida suratga olingan) va rejissyor Shuhrat Abbosovning "Olovli yo`llar" filmidagi atoqli o`zbek shoiri, dramaturg va jamoat arbobi Hamza Hakimzoda Niyoziy roli katta shuhrat keltirgan.
«Biz taniqli kinoijodkorlar xotirasini abadiylashtirish bo`yicha qator tashabbuslarimizni qo`llab-quvvatlagani uchun «O`zbekkino» Milliy agentligi rahbariyatidan mamnunmiz. Hozirda jamoa bilan 2021 yil kinorejissyor Shuhrat Abbosov tavalludining 90 yilligini nishonlashga qizg`in tayyorgarlik ko`ryapmiz va bu borada ham "O`zbekkino" MA bizga yordam bermoqda. Ayni kunlarda Moskva shahrida ustozoda kinorejissyorning mumtoz filmlari namoyishi bo`lib o`tmokda. Eng muhim yangiliklardan biri uning aksariyat kinolentalari raqamlashtiriladi. Bundan tashqari, Toshkent shahrida Shuhrat Abbosovga yodgorlik o`rnatish kabi ishlarni amalga oshirish ko`zda tutilgan», - deydi Respublika kinofondi direktori Eljon Abbosov.
Ta`kidlash joizki, "O`zbekkino" Milliy agentligi doimo taniqli kinoijodkorlar xotirasiga hurmat va ehtiromda bo`lib kelgan. Milliy kinolarning oltin to`plamiga abadiy kiritilgan aktyorlar va rejissyorlarning xotira va qadrlash kunlari muntazam ravishda o`tkazilmoqda. Jumladan, Hikmat Latipov, Abbos Bakirov, Razzoq Hamroev, Shukur Burxonov, Oybarchin Bakirova, Shuhrat Abbosov va boshqa buyuk ustozlarni xotirlash kunlarini yuksak saviyada o`tkazish rejalashtirilgan. O`zbek kinoarboblarining yubileylarini tantanali nishonlash o`ziga xos an`anaga aylanishi alohida e`tirofga loyiq.
